Бахшида ба “Соли ҷавонон” таҳти унвони “Пешвои миллат – рамзи иттиҳод ва сарҷамъии мо” ҳамоиши ҷавонони фаъол баргузор гардид.

Ҳамоиши мазкур бо иштироки раиси Кумитаи кор бо ҷавонон ва варзиши назди Ҳукумати ҷумҳурӣ Аҳтам Абдуллозода, гирандагони стипендияи президентӣ аз шаҳри Душанбе ва навоҳии тобеи он, ҷавонони фаъол ва омӯзгорон 1 декабри соли ҷорӣ дар Муассисаи таҳсилоти миёнаи умумии №100-и ноҳияи Шоҳмансур баргузор шуд.

Дар оғози ҳамоиш раиси Кумита Аҳтам Абдуллозода иброз дошт, ки мояи шодиву нишоти ҷавонони кишвар аст, ки бо ҳидоят ва раҳнамоиву пуштибонии Пешвои миллат, муҳтарам Эмомалӣ Раҳмон масо­или дастгирии давлатии ҷавонон ҳамчун ояндагони Ватан ва миллат дар саргаҳи сиёсати дурандешонаи Ҳукумати ҷумҳурӣ қарор гириф­та, ин нукта зимни суханрониҳои пурмуҳтаво ва мулоқотҳояшон баръ­ало эҳсос мегардад: “Маҳз дар замони соҳибистиқлолии Ватан бо ибтикороти наҷиб ва ҳадафҳои дурнигаронаи Пешвои миллат, муҳтарам Эмомалӣ Раҳмон ба масъалаи дастгирии давлатии ҷавонон таваҷҷуҳи бештар зоҳир гардида, баҳри муҳайё намудани шароити мусоиди таҳсил ва ҷалби бештари ҷавонон ба кору фаъо­лияти назаррас иқдомҳои шоиста роҳандозӣ гардида истодааст. Таъсиси стипендияи президентӣ барои хонандагони болаёқат намунаи олие аз иқдомҳои наҷиби Пешвои миллат, муҳтарам Эмомалӣ Раҳмон ба ҳисоб меравад”.

Қабл аз шуруъ шудани қисмати фарҳангии чорабинӣ аз ҷониби раиси Кумита шаҳодатномаҳо ба барандагони стипендияи президентӣ супорида шуд.

Дар қисмати фарҳангии ҳамоиш бошад, аз ҷониби донишҷӯён ва хонандагон суруду таронаҳо дар васфи Ватан ва ҷавонӣ пешкаши ҳозирин гардонида шуд.