Ба муносибати Рӯзи ҷавонони Тоҷикистон дар ноҳияи Ванҷ чорабинии ҷашнӣ таҳти унвони “Ҷовидон бод ҷавонӣ ва ҷавонон” баргузор гардид, ки дар он роҳбарияти мақомоти иҷроияи маҳаллии ҳокимияти давлатии ноҳия, толибилмону омӯзгорони муассисаҳои таҳсилоти миёна, коллеҷи тиббӣ, варзишгарон ва ҷавонони ноҳия ширкат намуданд.

Нахуст ҷавонону наврасон бо Парчами давлатӣ, шиору овезаҳо аз маркази ноҳия то майдони Исмоили Сомонӣ роҳпаймоӣ намуда, дар майдони мазкур ҷамъ омаданд.

Масрур Ғайратов, мудири Бахши ҷавонон, варзиш ва сайёҳии ноҳия зимни ифтитоҳи чорабинӣ ҷавононро ба ифтихори Рӯзи ҷавонон таҳният гуфта, иброз дошт, ки давлату Ҳукумати кишвар ва шахсан Асосгузори сулҳу ваҳдати миллӣ, Пешвои миллат, муҳтарам Эмомалӣ Раҳмон барои беҳтаркунии зисту шароити ҷавонон ҳамеша талош доранд:

- Ҷавонон, ки худ захираи тиллоии кишваранд, бояд дар рушду нумуъ, баланд бардоштани эътибори Ватан дар арсаи ҷаҳонӣ, гирифтани маълумот ва тақвияти савияи дониш ғайрати бештар намоянд,-гуфт ӯ.

Сипас, чанд тан аз ҷавонони ноҳия ба хотири иштироки фаъол дар корҳои ҷамъиятиву сиёсӣ, чорабиниҳои фарҳангӣ, варзишӣ аз ҷониби Шуъбаи Вазорати корҳои дохилӣ ва Бахши ҷавонон, варзиш ва сайёҳии ноҳияи Ванҷ бо мукофоту ифтихорномаҳо қадрдонӣ шуданд.

Машҳур ИМОМНАЗАРОВ, “ҶТ”