Бахшида ба Рӯзи байналмилалии волонтёрон дар Колеҷи тиббии шаҳри Хоруғ бо иштироки донишҷӯёну омӯзгорон ва волонтёрони шаҳр ҳамоиши идона баргузор намуд.

Дар ин бора аз Раёсати кор бо ҷавонон ва варзиши Вилояти Мухтори Кӯҳистони Бадахшон хабар доданд.

Гуфта шуд, ки дар ҳамоиш сардори Раёсати кор бо ҷавонон ва варзиши ВМКБ Амирҷонзода Солеҳҷон ва муовини директори Колеҷи тиббии шаҳри Хоруғ иштирок ва суханронӣ карданд.

Нахуст Сардори раёсат қайд кард, ки “Фаъолияти волонтёрӣ таърихи қадима дошта, миёни мардумони Осиё аз замонҳои қадим дар шаклҳои гуногун вуҷуд дошт. Аввалҳо дар шинохти мардум волонтёрон нафароне буданд, ки ихтиёран ба хизмати ҳарбӣ ҷалб мешуданд. Ин фаҳмиш то асрҳои 18-19 миёни мардумони Италия, Фаронса, Англия ва Германия корбурд мешуд. Аз аввалҳои асри 19 фаъолияти волонтёрӣ дар шаклҳои ташкилоти ҷамъиятӣ ё волонтёрии индивидуалӣ ба роҳ монда шуд. Дар бораи фаъолияти волонтёрӣ қонун низ қабул гардидааст, ки мувофиқи он фаъолияти волонтёрӣ- ин шакли кор ва хизматрасонӣ аз ҷониби шахсони воқеӣ ва ҳуқуқӣ дар самти беҳдошти вазъи иҷтимоию иҷтисодӣ ва маънавии давлат мебошад.”

Ҳамзамон гуфта шуд, ки волонтёр шахси ихтиёрие аст, ки бо интихоби озоди вақт, кор ва малакаи худро бемузд ва ё ҷуброни хароҷот бевосита ва ё ба воситаи ташкилоти ҷалбкунанда ба манфиати ҷомеа пешниҳод менамояд.

Дар фарҷом аз ҷониби масъулини бахши фарҳанги шаҳри Хоруғ чорабинии фарҳангӣ манзури иштирокчиён гардид.

Наҷиба МУРОДБЕКОВА, “ҶТ”