Дар шаҳри Бӯстон бахшида ба Рӯзи ҷавонони Тоҷикистон чорабиниҳои идона баргузор шуд.

Нахуст таҳти унвони “Ҷавонон -пайрави Пешвои миллат” роҳпаймоӣ доир гардида, дар он гирандагони Стипендияи президентӣ, стипендияи раиси шаҳри Бӯстон, ғолибони олимпиадаҳои байналмилалӣ, ҷумҳуриявию вилоятӣ, сарбозону афсарони қисмҳои низомӣ, донишҷӯёну ҷавонони касбу кори гуногун ширкат намуданд. 

Баъд аз роҳпаймоӣ дар майдони Нишони давлатии Ҷумҳурии Тоҷикистон дар шаҳри Бӯстон бо иштироки роҳбарияти шаҳр, ҷавонон ва сокинон чорабинии бошукуҳ доир гардид.

Нахуст Нигора Ғаффорзода, сардори Раёсати кор бо занон ва оилаи вилояти Суғд номаи табрикотии раиси вилоят Раҷаббой Аҳмадзодаро ба самъи иштирокдорон расонид.

Сипас, раиси шаҳри Бӯстон Раъно Ҳошимзода кулли ҷавононро ба ин санаи хотирмон таҳният гуфта, барояшон сиҳатмандӣ ва муваффақиятҳо таманно намуд. Гуфта шуд, ки мақомоти иҷроияи ҳомияти давлатии шаҳри Бӯстон дар заминаи дастуру супоришҳои Пешвои миллат муҳтарам Эмомалӣ Раҳмон баҳри дастгирии давлатии ҷавонон аз тамоми имкониятҳо истифода намуда, ҷиҳати фароҳам намудани шароити мусоиди кору зиндагӣ, таълиму тарбия ва касбу ҳунаромӯзии насли шоистаи замон кӯшишҳои судмандро равона намуда истодааст.

Дар охир барномаи рангини консертӣ  манзури иштирокдорони чорабинӣ гардонида шуд.