Бо ташаббуси Бахши кор бо ҷавонон ва варзиши шаҳри Панҷакент вохӯрӣ бо хонандагони муассисаи таҳсилоти миёнаи умумии №72-и ҷамоати деҳоти Саразми шаҳри Панҷакент дар мавзӯи “Тарзи ҳаёти солим-беҳтарин роҳи пешгирии ВНМО” баргузор гардид.

Директори мактаби мазкур вохӯриро ифтитоҳ намуда, меҳмонону иштирокдоронро шодбош гуфт. Дар чорабинии мазкур дар баробари устодону хонандагон мудири Бахши кор бо ҷавонон ва варзиши шаҳр Бобоев Фирӯз ва гирандагони Стипендияи президентӣ иштирок ва суханронӣ намуданд.

Бобоев Фирӯз перомуни ба оилаи вирусҳои иртиҷоӣ (Retroviridae), ҷинси лентивирусҳо (Lentivirus) дохил шудани вируси норасоии масунияти одам, вируси аз ҳама омӯхташуда будани он дар ҷаҳон, одамони бо ВНМО зиндагикунандаро ВНМО мусбӣ (мусбӣ +), ё ин ки мубталои ВНМО номидан ва пешгирӣ аз ин беморӣ изҳори андеша намуд.

Дар идомаи чорабинии мазкур гирандагони Стипендияи президентӣ дар баромадҳояшон иброз намуданд, ки машғул гардидан ба варзиш ва тарзи ҳаёти солим беҳтарин омили пешгирӣ аз ВНМО мебошад. Ташкилу баргузории ин қабил чорабиниҳо бо иштироки мутахассисони соҳа имкон медиҳад, ки хонандагон дар мавриди ин беморӣ маълумоти бештар гирифта, дар пешгирии он саҳми назарраси худро гузоранд.