Бо ибтикори Бахши ҷавонон, варзиш ва сайёҳии ноҳияи Сино таҳти унвони “Ҷавонон, манфиатҳои миллӣ, истиқлолият ва ягонагӣ” мизи мудаввар баргузор гардид. Дар он беш аз 60 нафар ҷавоне, ки дар самтҳои гуногуни масъалаҳои марбут ба ҷомеашиносӣ кори илмӣ доранд ва ҷавонони фаъол иштирок доштанд.

- Ҳадаф аз доир намудани мизи мудаввар ҳимояи арзишҳову манфиатҳои миллӣ, ташаккули ҳисси худшиносиву худогоҳии ҷавонон, баланд бардоштани маърифати зеҳнии онҳо ва бо ин васила ба ҳам овардани ҷавононе мебошад, ки ба илм машғуланд, - гуфт дар суҳбат Абдулло Давлатзода, мудири Бахши ҷавонон, варзиш ва сайёҳии ноҳияи Сино.

Дар чорабинӣ зиёда аз 15 маърӯза, ки моҳиятан фарогири мавзӯъҳои сиёсиву иқтисодӣ, фарҳангиву маданӣ буда, дар умум масоили марбут ба манфиатҳои миллӣ, арзишҳои соҳибистиқлолии кишвар ва ҳамчунин ҷойгоҳи ҷавононро дар самти гиромӣ доштан аз онҳо мушаххас менамоянд, мавриди баррасӣ қарор гирифтанд.