Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар доираи сафарии кории худ ба Вилояти Мухтори Кӯҳистони Бадахшон бо ҷавонону варзишгарон ва масъулини Раёсат, бахшҳои кор бо ҷавонон ва варзиши шаҳру ноҳияҳои вилояту ҷавонони касбу кори гуногун мулоқот намуд.

Дар ноҳияи Дарвоз раиси кумита бо муррабиёни Мактаби варзишӣ ва кормандони Бахши кор бо ҷавонон ва варзиши ноҳия оид ба тақвияти тарзи ҳаёти солим, бунёди иншооти нави варзишӣ, тарбияи ҷавонон дар рӯҳияи баланди ватандӯстиву худшиносӣ ва дигар масоили мубрам суҳбати озоду самимӣ карда, аз ҳозирин даъват ба амал овард, ки дар рушди соҳа, беҳбуд ёфтани ҳама гуна шароитҳои ҷавонон минбаъд ҳам тамоми кӯшишҳоро ба кор баранд.

Дар ҷараёни сафари корӣ ба ноҳияи Ванҷ А. Раҳмонзода аз бахшу мактаби варзишии ноҳия боздид ба амал оварда, бо масъулини соҳаи кор бо ҷавонону варзиш вобаста ба пешгирии бемориҳои сироятӣ, аз қабили COVID – 19, риояи қатъии гигиенаи шахсӣ, баргузории чорабиниҳои варзишӣ – маърифатӣ, тавсеаи корҳои ободонӣ, пайваста роҳандозӣ кардани корҳои тарғиботию ташвиқотӣ ва ба ин васила баланд брадоштани ҳисси ифтихори миллӣ мулоқот намуд.

Зикр гардид, ки ҳамаи талошҳои хастанопазири Асосгузори сулҳу ваҳдати миллӣ- Пешвои муаззами миллат муҳтарам Эмомалӣ Раҳмон ва Ҳукумати кишвар маҳз барои баланд бардоштани сатҳу сифати зиндагии аҳолӣ, хоса наслҳои имрӯзу фардо равона шуда, ҷавононро мебояд, ки дар гулгулшукуфии Ватани азиз нақши арзанда гузоранд ва ба ғамхориҳои бемислу монанди Сарвари давлат сазовор бошанд.
Дар ноҳияи Рӯшон раиси кумита оид ба таъмиру азнавсозии бинои Бахши кор бо ҷавонон ва варзиш, вусъати корҳои созандагӣ, беш аз пеш ба роҳ мондани тарғибот оид ба тарзи зиндагии солим ва дигар масъалаҳои рӯзмарра бо кормандони бахшу варзишгарон ва ҷавонону сокинони ноҳия вохӯрӣ кард.



Раиси кумита таваҷҷуҳи ҳозиринро ба тавсеаи мусобиқаҳои сатҳи ноҳиявию ҷамоатӣ, рушди бозиҳои волейбол, футбол, шоҳмот ва ғайра равона намуда, таъкид кард, ки дар ин ҷода бояд тадбирҳои иловагӣ мавриди корбурд қарор гиранд.

Бояд зикр кард, ки 20 августи соли равон Пешвои миллат муҳтарам Эмомалӣ Раҳмон дар деҳаи Барзуди ноҳияи Рӯшон майдони муосири варзиширо мавриди истифода қарор доданд, ки масоҳати умумии майдончаи варзишӣ 800 метри мураббаъ мебошад ва дар он бозиҳои футболи хурд, волейбол ва баскетбол гузаронида мешавад.

Дар шафати варзишгоҳ майдони васеи футбол мавҷуд аст. Ҳамчунин як майдончаи бозӣ барои кӯдакон низ бунёд шуда истодааст ва он рӯзҳои наздик пурра ба истифода супорида мешавад.

Дар ҳудуди ноҳияи Рӯшон се майдончаи муосири варзишӣ мутобиқ ба талаботи замон бунёд шудааст ва ҳоло сохтмони боз се майдонҳои варзишии дигар низ бо ҷалби ҷавонмардони саховатманд идома дорад.

Имрӯз, 21 август дар доираи сафари корӣ ба шаҳри Хоруғ Асосгузори сулҳу ваҳдати миллӣ муҳтарам Эмомалӣ Раҳмон дар маҳаллаи Тирчиди шаҳри Хоруғ бо як майдончаи муосири варзиширо мавриди баҳрабардорӣ қарор доданд ва дар ин кор Пешвои миллатро раиси кумита низ ҳамроҳӣ намуданд.

Ифтитоҳи майдончаи варзишӣ дар ҳамкории давлат бо бахши хусусӣ сурат гирифта, яке аз иншооти муосир дар маркази вилоят маҳсуб меёбад. Кӯдакону наврасон ва ҷавонони ин маҳалла солҳои зиёд ба чунин иншооти замонавии варзишӣ эҳтиёҷ доштанд.

Майдончаи варзишӣ дар масоҳати умумии 1170 метри мураббаъ, дар доираи татбиқи Лоиҳаи “Мусоидат ба сулҳу субот тавассути инфрасохтори муҳим дар шаҳри Хоруғ” бунёд ёфта, дорои 320 ҷойи нишаст мебошад.

Айни ҳол раиси кумита А. Раҳмонзода бо сардори Раёсати кор бо ҷавонон ва варзиши вилоят Сураҷ Чоршанбиев ва дигар масъулини соҳаи кор бо ҷавонон дар ноҳияи Роштқалъаи ВМКБ қарор дошта, дар ин бора баъди анҷоми суҳбат бо сокинону ҷавонони ноҳия гузориши муфассалро манзуратон мегардонем.