Бо мақсади тақвият бахшидани иттиҳоди ҷавонон, баҳрабарӣ аз нерӯи зеҳнии онҳо ва амалигардонии сиёсати ягонаи давлатӣ оид ба татбиқи Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон” дар Омӯзишгоҳи тиббии Хоруғ Шӯрои кор бо ҷавонон таъсис ёфт.

Шӯро бо ибтикори Раёсати кор бо ҷавонон ва варзиши ВМКБ, Муассисаи давлатии маркази ҷавонони вилоят ва Омӯзишгоҳи тиббӣ ташкил гардида, зиёда аз 50 нафар ҷавондухтарони синни аз 18 то 30 сола аъзои он шуданд.

Дар ҷаласаи аввалини Шӯро Ризо Раҳматшоев, сардори Раёсат, Хубчеҳра Гулаёзова, директори муассиса, Сураҷ Чоршанбиев ва Дидоршоҳ Насриддинов, кормандони Раёсату муассиса иштироку баромад намуда, ҷавононро ба ҳамкориҳои муштарак баҳри ободии Ватан, рӯ овардан ба фаъолиятҳои иҷтимоӣ, муқаддас донистани арзишҳои миллӣ, ҷалб кардани наслҳои наврасу ҷавон ба солимию беҳзистӣ, самаранок истифода кардан аз имкониятҳои мавҷуда дар риштаи варзиш ва таҳкими маърифату омӯзиш даъват карданд.

Таъкид гардид, ки дар оянда чунин Шӯроҳо дар назди дигар муассисаҳои маҳаллии шаҳру ҷамоатҳои навоҳии вилоят таъсис хоҳад ёфт.

Дар охир аз ҷониби роҳбарияти Раёсат ба чанд тан аз муҳассилини омӯзишгоҳи тиббӣ барои хониши аъло, рафтори намунавӣ, иштироки фаъолона дар чорабиниҳои сиёсӣ – фарҳангӣ бо ифтихорнома қадрдонӣ шуданд.