Дар Донишгоҳи давлатии Хоруғ ба номи Моёншо Назаршоев бо иштироки ҷавонону донишҷӯёни фаъол дар мавзӯи “Роҳандозии низомномаи созмону шуъбаи кор бо ҷавонони муассисаҳои таҳсилоти касбӣ дар татбиқи сиёсати давлатии ҷавонон” семинар омӯзишӣ доир гашт.

Семинар бо ҳадафи рушди касбияти ҷавонон дар татбиқи сиёсати давлатӣ, таҳкими ҳамкориҳои ҷавонону муҳассилини муассисаҳои таҳсилоти олии касбӣ, ташкилу вусъати корҳои созандагӣ, ҷалби ҳарчи бештари ҷавонон ба машғулиятҳои маърифатӣ – фарҳангӣ ва варзишӣ гузаронида шуд.

Ба иттилои ташкилкунандаи семинар ва мудири Шуъбаи кор бо ҷавонони Донишгоҳ Дидоршоҳ Насриддинов, минбаъд дар доираи мавзӯъ озмуну барномаҳои телевизионӣ, омӯзиши иловагии забонҳои англисиву русӣ, фанҳои дақиқ ва маҳфилҳои адабии навқаламон дар донишгоҳ баргузор мегарданд.

Мавриди зикр аст, ки ин иқдоми шуъба бевосита аз тарафи роҳбарияти донишгоҳ давра ба давра дастгирӣ меёбад.