Ҷавонони фаъоли ихтиёриёни нази Раёсати кор бо ҷавонон ва варзиши вилояти Хатлон бо усули “Хона ба хона” барои тарғиби моҳияти қонунҳои кишвар, пешгирӣ аз гаравиши ҷавонон ба ҳизбу ҳаракатҳои ифротӣ, ҳифзи дастовардҳои даврони соҳибистиқлолӣ ва даъват ба созандагӣ ширкат карданд.

Чанде пеш бо ташаббуси Раёсати кор бо ҷавонон ва варзиши вилояти Хатлон ҳудуди 50 ҷавон дар ноҳияи Шаҳритус ва Носири Хусрав бо усули “Хона ба хона” бо сокинон мулоқот карда, моҳияти қонунҳои амалкунандаро фаҳмонданд ва ҷавононро барои саҳм гузоштан дар корҳои ободонию созандагӣ ҷалб намуданд.

Ҷавонон бештар дар мавриди қонунҳои Ҷумҳурии Тоҷикистон “Дар масъулияти падару модар дар таълиму тарбияи фарзанд” ва “Дар бораи танзими анъана ва ҷашну маросимҳо дар Ҷумҳурии Тоҷикистон” бо сокинон мулоқот намуданд.

Мардуме, ки шоҳиди мулоқоти ҷавонон шудаанд ва мушкилашонро ба онҳо баён карданд, аз дастгириҳои Ҳукумати кишвар изҳори қаноатмандӣ намуда, ҷавобан ба ғамхориҳои пайвастаи Асосгузори сулҳу ваҳдати милли - Пешвои миллат, муҳтарам Эмомалӣ Раҳмон ваъда доданд, ки дар ободони маҳалла ва ноҳияи худ саҳм мегузоранд.

Ин мулоқотҳо ё усули “Хона ба хона” аз ҷониби ҷавонон дар дигар шаҳру навоҳӣ, аз ҷумла дар ноҳияҳои Восеъ, Ҷайҳун, Қубодиён ва Дӯстӣ баргузор шуд.

 Умед МИРЗОЕВ, “ҶТ”