Алимардон Раҳмонов аз зумраи хонандагони фаъолу аълохони муассисаи таҳсилоти миёнаи умумии рақами 10-и ноҳияи Ҷалолиддини Балхӣ буда, чандин маротиба дар озмунҳои вилоятиву ҷумҳуриявӣ иштирок намудаву ба гирифтани ҷойҳои намунавӣ мушарраф гардидааст. Ӯ дар синфи нуҳум таҳсил мекунад. Бо дониши хубу рафтори некаш барои ҳамсолони худ намунаи ибрат гардидааст.

Алимардон дар баробари хонандаи фаъолу аълохон будан ҳамзамон навовару ихтироъкор низ ҳаст. Аллакай ҳашт номгӯи асбобу таҷҳизоти гуногун сохтааст. Ҷузвдони электрикӣ, дарзмоли бехатар, пардаи бо пулт идорашаванда, аробачаи маъюбӣ барои дар рӯи фарши шишагӣ ҳаракат кардан ва асбоби махсус бо номи “Ҷило” барои шустани қошиҳо (кафел) асбобҳои сохтаи ӯ мебошанд.

Ҳар яки ин асбобҳо махсусияти худро дорад. Масалан, ҷузвдони электрикӣ дар дохили худ батареяҳои аз нури офтоб қувватгиранда дошта, ба воситаи он телефон ва планшет қувва мегиранд. Гармӣ, хунукӣ ва обро намегузаронад. Дар дохили он ноутбук, планшет ва дастгоҳҳои аксбардориро ҷо кардан мумкин аст. Чунин ҷузвдон асосан барои кӯҳнавардон пешбинӣ шудааст. Дар ҷузвдони электрикӣ ҳамчунин шишаҳои рӯшноидиҳанда насб карда шудаанд, ки ҳангоми шабон рӯшноӣ медиҳанд. Бар замми ин, қулфи ҷузвдон бо нерӯи барқ пайваст аст. Яъне, шахси бегона онро кушода наметавонад.

Дарзмоли бехатар, ки аз қисми поёнии зарфи чойҷӯшонӣ ва худи дарзмол иборат аст, ҳангоми дарзмол кардани либос то дараҷаи муайян гарм шуда, ба таври автоматӣ хомӯш мешавад. Яъне, агар шахсе дарзмолро дар болои куртаи худ гузошта, аз паи дигар корҳояш шавад, куртааш ба дарзмол намечаспад ва ё намесӯзад.

Алимардон Раҳмонов дар як қатор озмунҳо ширкат варзидааст. Аз ҷумла, соли 2016-ум дар озмуни телевизионии навоварону ихтироъкорони ҷавон “Бозёфт”, ки бахшида ба 25-солагии Истиқлолияти давлатии Ҷумҳурии Тоҷикистон баргузор шуда буд, иштирок намуда аробачаи маъюбии барои дар рӯи фарши шишагӣ (кафел) ҳаракат кардан ва асбоби махсус бо номи “Ҷило” барои шустани қошиҳоро (кафел) пешниҳод карда, бо диплом ва ҷоизаи “Бозёфт”-2016 сарфароз гардид.

Ӯ ҳамчунин ғолиби озмуни ноҳиявии “Ҳунари ман зебост” ва озмуни вилоятии “Маҳорати олӣ” мебошад. Бо ифтихорномаҳои шуъбаи маорифи ноҳияи Ҷалолиддини Балхӣ ва Раёсати маориф ва илми вилояти Хатлон қадрдонӣ шудааст.

Айни замон ӯ аъзои фаъоли маҳфили “Ихтироъкорони ҷавон” буда, донишу малака ва истеъдодашро дар назди устодонаш Суннатулло ва Султонмурод Қосимовҳо сайқал медиҳад.

Умед Мирзоев, “ҶТ”