Дар шаҳри Хоруғ 20 январ бо иштироки муовини раиси Маҷлиси миллии Маҷлиси Олии Ҷумҳурии Тоҷикистон, раиси Вилояти Мухтори Кӯҳистони Бадахшон Ёдгор Файзов ва муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ризо Назарзода ҷаласаи Шӯрои кор бо ҷавонони назди раиси вилоят баргузор гашт.    

Нахуст, сардори Раёсати кор бо ҷавонон ва варзиши ВМКБ, котиби шӯро - Чоршанбиев Сураҷ оид ба масъалаи “Татбиқи сиёсати давлатии кор бо ҷавонон дар ВМКБ: мушкилот ва дурнамо” ҳисоботи муфассал манзур кард.

Зикр гардид, ки ҷиҳати расонидани мазмуну мӯҳтавои Паёми Президенти Ҷумҳурии Тоҷикистон муҳтарам Эмомалӣ Раҳмон миёни наслҳои ояндасоз аз соли гузашта то инҷониб зиёда аз 87 маротиба бо фарогирии 37120 нафар ҷавонону наврасони вилоят мулоқотҳои судманд доир шуданд.



Дар идома таъкид гардид, ки шумораи гирандагони стипендия дар вилоят 56 нафар буда, аз ин теъдод 26 нафар гирандаи Стипендияи президентӣ, 10 нафар гирандаи стипендияи раиси вилоят ва 21 нафар гирандаи стипендияи раисони шаҳру ноҳияҳо мебошанд. Соли 2020 варзишгарони вилоят дар ду мусобиқаи байналмилалӣ, 26 мусобиқаю 15 чемпионати ҷумҳуриявӣ ширкат намуда, 188 медалро соҳиб шуданд, ки аз инҳо 36 медали тилло, 62 нуқра ва 90 медали биринҷианд.

Ба таъкиди Ризо Назарзода, муовини якуми раиси Кумитаи кор бо ҷавонон ва варзиши назди Ҳукумати кишвар солҳои охир бо иштироки бевоситаи Пешвои муаззами миллат муҳтарам Эмомалӣ Раҳмон дар ВМКБ як қатор иншооти муҳими иҷтимоию варзишӣ мавриди баҳрабардорӣ қарор гирифта, саҳму иштироки ҷавонони вилоят дар маъракаҳои муҳими сиёсии кишвар шоистаи таҳсин аст.

Ҳамзамон зимни таҳлили амиқи баъзе масоили ҳалталаб аз қабили нарасидани маблағ барои сафарбар намудани варзишгарон ба чорабиниҳои сатҳи ҷумҳуриявию байнамилалӣ, беҳбудӣ тақозо кардани ҳисси худшиносию меҳанпарастӣ, зери таъсироти гурӯҳҳои муташаккили ҷиноятӣ қарор доштани баъзе ҷавонон, дар сатҳи зарурӣ фаъолият накардани иншооту муассисаҳои варзишии вилоят, ҷоннок намудани фаъолияти филиалҳои “Иттифоқи ҷавонони Тоҷикистон” дар сатҳи идораву муассисаҳои маҳаллӣ, ҳамоҳанг кардани фаъолияти раёсату муассисаҳои варзишии вилоят, ташкил намудани курси бозомӯзии “Сарварони ҷавон” - мактаби давлатдории Пешвои миллат, дар арафаи ҷашни 30 – солагии Истиқлолияти Ҷумҳурии Тоҷикистон сафарбар намудани ҷавонон ба дигар шаҳру ноҳияҳои кишвар яқ қатор қарору пешниҳодҳои судманд пазируфта шуданд.

Дар интиҳо раиси вилоят Ёдгор Файзов аз ҷавонон даъват ба амал овард, ки тамоми талошҳои худро ба ободкориву созандагӣ, омӯзиши илм ва тақвияти ҳаёти солим башанд. Зеро айёми ҷавонӣ зудгузар ҳасту онро хирадмандонаю боҳадаф паси сар бояд кард.



Сипас, раиси вилоят аз тарафи Кумитаи кор бо ҷавонон ва варзиш бо унвони “Корманди шоистаи тарбияи ҷисмонӣ ва варзиши Ҷумҳурии Тоҷикистон” ва дигар кормандони соҳаи варзиши вилоят бо унвонҳои гуногуни варзишӣ сарфароз гаштанд.