Дар доираи чорабиниҳо бахшида ба “Соли ҷавонон” 21 апрел дар маркази ВМКБ - шаҳри Хоруғ таҳти унвони “Ҷавонон - пайрави Пешвои миллат” ҳамоиши оммавӣ баргузор гардид, ки дар он зиёда аз 800 нафар ҷавону наврасон иштирок доштанд.

Иштирокдорон баъди раҳпаймоӣ аз варзишгоҳи марказӣ то майдони Исмоили Сомонӣ дар Боғи Парчам гирд омаданд. Нахуст, Арамбегим Маҳтобшозода, раиси шаҳри Хоруғ ҷавононро ба муносибати “Соли ҷавонон” табрик намуда гуфт, боиси фараҳмандист, ки ҷавонони кишвар сиёсати инсонпарварона ва хирадмандонаи Пешвои миллат, муҳтарам Эмомалӣ Раҳмонро пайваста дастгирӣ менамоянд:

- Президенти кишвар насли нарасу ҷавононро ҳамеша ба он ҳидоят мекунанд, ки Истиқлолият, озодӣ ва дигар дастовардҳои миллиамонро чун гавҳараки чашм ҳифз намоянд. Ҷавонону наврасон бояд чунин таъкидҳоро сармашқи кору ҳаёти ҳаррӯзаи хеш қарор диҳанд, - қайд намуд Арамбегим Маҳтобшозода.

Имомёрбек Имомёрбеков, мудири Бахши ҷавонон, варзиш ва сайёҳии шаҳри Хоруғ зимни баромади хеш ҷавононро ба ободкориву созандагӣ, сарсабзу хуррамгардонии маркази вилоят, кӯчаву маҳаллаҳо даъват намуда изҳор дошт, ки бояд дар ҳамаи корҳо дастаҷамъона фаъолият кунем.

Ёдовар мешвем, ки чорабинии мазкур бо ташаббуси Бахши ҷавонон, варзиш ва сайёҳии шаҳр ташкил шуда, дар он роҳбарияти вилоят, намояндагони сохторҳои қудратӣ, аҳли зиё, омӯзгорони Донишгоҳи давлатии Хоруғ, Мактаби президентӣ ва дигар муассисаҳои таълимӣ ҳузур доштанд.

Дар фарҷоми чорабинӣ аз ҷониби аҳли санъати вилоят барномаи ҷолиби фарҳангӣ пешкаши ҳозирин гардид.