Зери унвони “Ҷавонон - пайрави Пешвои миллат” дар бинои мақомоти иҷроияи маҳаллии ҳокимияти давлатии ВМКБ мулоқоти намоядагони Кумитаи кор бо ҷавонон ва варзиши назди Ҳукумати кишвар бо зиёда аз 75 нафар ҷавонони фаъол ва муҳассилини Донишгоҳи давлатии Хоруғ ба номи Моёншо Назаршоев доир гардид.

Дар он Дидоршоҳ Насриддинов, мудири шуъбаи кор бо ҷавонони назди Донишгоҳ, сардори Раёсати кор бо ҷавонони Кумита Шаҳзод Раҳимзода, мудири Бахши кор бо ҷавонон ва варзиши шаҳр Имомёрбек Имомёрбеков ва дигар кормандони соҳаи кор бо ҷавонон ҳузур доштанд.

Дар мулоқот ҳозирин мавзӯъҳои дастгириҳои ҳамешагии Пешвои миллат муҳтарам Эмомалӣ Раҳмон ба ҷавонон, муҳаё гаштани ҳама гуна шароиту имкониятҳо барои фаъолияти гуногуни наслҳо аз тарафи Ҳукумати ҷумҳурӣ, эҳтироми ҷавонон нисбати волидон, аз даст надодани ҳушёрии сиёсӣ дар марҳилаи ҷаҳонишавӣ ва дигар масоилро мавриди баррасӣ қарор доданд.

Бояд қайд кард, ки миёни намояндагони Кумита ва ҷавонон сӯҳбати озоду самимӣ баргузор шуда, ҷавонони вилоят фикру дархостҳои судмандро ба масъулин пешниҳод намуданд.