Бо ҳадафи татбиқи сиёсати давлатии кор бо ҷавонон, таҳкими ҳисси худшиносию ифтихори миллӣ ва дарки моҳияти Паёми Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон дар шаҳру ноҳияҳои Вилояти Мухтори Кӯҳистони Бадахшон мулоқоти гурӯҳи кории Кумитаи кор бо ҷавонон ва варзиши мамлакат таҳти роҳбарии Ризо Назарзода бо ҷавононону касбу кори гуногун сурат гирифт.

Силсилавохӯриҳо зери унвони "Ҷавонон ва 30 соли даврони Истиқлолият" 8 апрели соли равон аз ноҳияи Дарвоз оғоз ёфт. Нахуст Р. Назарзода ва масъулини кумита дар ҳамоиши ҷавонони ноҳия бо унвони “Паём ва манфиатҳои миллӣ”, ки зиёда аз 250 нафар ҷавононро ба ҳам овард, ширкат намуданд.

Зикр шуд, ки озмунҳои дар паём зикргардида, як такону имконияти ҷиддӣ барои наслҳои ояндасоз мебошанд, то онҳо аз худ дониш, маҳорат ва истеъдодҳои нав нишон диҳанд. Дар умум паёмҳои Сарвари давлат роҳнамо ва калиди рушду пешрафти тамоми соҳаҳои мамлакат ба шумор рафта, ояндаи неки давлату миллатро таъмин месозанд.

Пас аз ҳамоиш аъзоёни гурӯҳи корӣ аз қисми ҳарбии 0409 – и Қушунҳои сарҳадии КДАМ дидан намуда, бо шароиту имкониятҳои ҳайати шахсии сарбозону афсарон аз наздик шинос шуданд ва аз номи кумита ба муҳофизони Ватан – Модар туҳфаҳои хотиравӣ тақдим карданд.

Зимни баргузории чунин суҳбату мулоқот дар ноҳияи Ванҷ таъкид гашт, ки баланд бардоштани савияи дониш, таҳкими меҳандӯстӣ, пешгирӣ аз шомилшавии ҷавонон ба ҳизбу ҳаракатҳои ифротӣ ва адо намудани хизмати ҳарбӣ, минбаъд ҳам аз ҷавонону наврасон ҷиддияту камолот мехоҳад.

Дар ин раванд роҳбарияти кумита ба масъулини соҳаи кор бо ҷавонони ноҳия дастуру супоришҳои иловагӣ дода, сипас ба гирандагони стипендияи президентӣ (давоми таҳсили солҳои 2020 -2021) шаҳодатномаву маблағи стипендия ва ба ҷавонони фаъоли ноҳия сипосномаи раиси Кумитаи кор бо ҷавонон ва варзиши назди Ҳукумати кишварро тақдим намуд.

Ҳамин гуна, 9 апреси соли равон, гурӯҳи корӣ ба ёдати ҷавонони дорои имконияташ махдуди ноҳия рафта, пас аз мулоқоти самимӣ бо онҳо дар иншоотҳои варзишию низомӣ бо варзишгарону сарбозон перомуни “Ҷавонон ва 30 соли даврони Истиқлолият" суҳбатҳо оростанд.

Дар ноҳияи Рӯшон бо иштироки Р. Назарзода ва мудири бахши итилоот ва таҳлили кумита Шаҳбози Искандар зери унвони "Истиқлолият, Пешвои миллат ва ҷавонон” силсилачорабиниҳои илмӣ - маърифатӣ, зеҳнӣ - фарҳангӣ, варзишӣ ва суҳбату мулоқот бо ҷавонони касбу кори гуногун ба ифтихори 30-солагии Истиқлолияти давлатии Ҷумҳурии Тоҷикистон рӯи кор омад.

Сипас, намояндагони кумита дар деҳаҳои Барӯшону Дерзуд ва дигар деҳаҳо дар чорабаниҳои варзишии усули “Деҳа ба деҳа” ширкат варзида, ба варзишгарону ҷавонон лавозимоти варзишӣ такдим намуданд.

Ҳини мулоқот бо ҳайати шахсии сарбозону афсарони дидбонгоҳи сарҳадии 0410 – и Қушунҳои сарҳадии КДАМ дар маркази ноҳияи Рӯшон таъкид шуд, ки низомиён бояд бедории ҳарбиву сиёсиро аз даст надиҳанд ва барои ором нигоҳ доштани сарҳад тамоми неруро ба кор баранд. Дар охир лавозимоти варзишӣ аз номи кумита, инчунин ба сарбозони дидбонгоҳи болозикр низ тақдим гаштанд.

Мавриди зикр аст, силсиламулоқотҳои масъулини кумита дар ноҳияҳои ВМКБ ҳанӯз ҳам бомаром ҷараён доранд.