Ҷавонони Вилояти Мухтори Кӯҳистони Бадахшон бо дарки асолату ҳуввият, ватандӯстӣ чун анъана нақшаи даъват ба хизмати ҳарбиро дар рӯзи аввали он сарбаландона иҷро намуданд.

Дар ин бора раиси вилоят Мирзонабот Алишери Худобердӣ зимни баромади худ дар чорабинии тантанавӣ, ки ба ифтихори гусели наваскарон ба хизмат дар шаҳри Хоруғ доир шуд, мужда расонид.

Номбурда аз ҷумла қайд кард, ки Қувваҳои Мусаллаҳи кишвар мактаби ташаккули шахсият ва ҷавонмардӣ буда, баъд аз адои он ҷавонон аз ҳар ҷиҳат омодаву обутобёфта ба ҳаёти ҷамъиятӣ ворид мегарданд.

“Дар асоси ташаббусҳои пайгиронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои Қувваҳои Мусаллаҳи кишвар заминаи боэътимод гузошта шуд.

Яке аз роҳҳои зарурию дар сатҳи мудофиавӣ нигоҳ доштани неруҳои ҳарбии мамлакат ин таълиму тарбияи шаҳрвандон, хосса насли ҷавон ба шумор меравад. Аллакай дар замони соҳибистиқлолӣ ҳазорҳо ҷавонписарони далеру ғаюр ва шуҷои Ватан ин мактаби мардонагиро бо сари баланд гузашта, вазифаи муқаддаси шаҳвандиро дар назди он иҷро намуданд ва донишу малакаи нав, маҳорати ҳарбиро гирифтанд” – гуфт раиси ВМКБ.

Номбурда дар идома таъкид намуд, ки Ҳукумати Ҷумҳурии Тоҷикистон бо мақсади таълимоти иҷтимоии ҳайати шахсии ҷузъу томҳои низомӣ ҳамасола тасмиму тадбирҳои мушаххасро ба кор андохта, баҳри сарбозону афсарон имтиёзҳои зиёдро ҷорӣ менамояд.

Дар охир барномаи консертии аҳли фарҳанги вилоят пешкаши ҷамъомадагон гардид.