Вобаста ба тафсиру талқини бобҳо, моддаҳои Конститутсияи Ҷумҳурии Тоҷикистон ва фаҳмондани муҳиммияти он ба ҷавонону наврасон масъулини Бахши кор бо ҷавонон ва варзиши ноҳияи Дарвоз дар мактабҳои таҳсилоти миёнаи умумии ноҳия мулоқот гузарониданд.

Вохӯриҳо дар МТМУ – и №40 ва 42 гузашта, инчунин дар онҳо омӯзгорони мактабҳо иштирок намуданд.

Зимни мулоқот қайд гардид, ки халқи тоҷик дар назди худ ҳадафи бунёди давлати соҳибихтиёру демократӣ, ҳуқуқбунёду дунявӣ ва иҷтимоиро гузошта, дар назди наслҳои оянда ӯҳдадор шудааст, ки барои онҳо ҳаёти бошарафона, рушди иҷтимоӣ ва давлати аз нигоҳи сиёсӣ босуботро мерос гузорад. Яке аз нишонаҳои асосии ҳама гуна давлату давлатдорӣ соҳибихтиёрӣ ё худ истиқлолияти он мебошад. Конститутсияи мо ҳамчун қонуни асосии кишвар воқеияти истиқлолияти миллиро сабт намуда, аз ин роҳ рушди озодонаи давлатдории тоҷиконро таъмин мекунад.