2 май дар толори бинои “Душанбе плаза” раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода бо гирандагони стипендияи раиси шаҳри Душанбе, квотаҳои президентӣ ва ҷавонони аълохон вохӯрӣ намуданд. 

Раиси кумита зимни суханронии хеш қайд намуд, ки: “Имруз ҷавонони саодатманди кишвар бо муҳаббати самимӣ ба Ватан, таърихи пурифтихори миллат ва ниёгони фарҳангдӯсту тамаддунофари хешро беш аз пеш аз худ карда, ҷиҳати саҳмгузорӣ дар афзун гардонидани дастовардҳои ҷаҳони муосир, пешрафти илму техника, инкишофи робитаҳои байналмилалии кишвар ва ба давлати мутамаддини олам табдил додани кишварамон камари ҳиммат бастаанд”.

Чорабинии мазкур таҳти сарпарастии президенти Федератсияи футболи Тоҷикистон Рустами Эмомалӣ бо ташаббуси Кумитаи кор бо ҷавонон ва варзиш бахшида ба Рӯзи ҷавонони Тоҷикистон доир гашта, баҳри болидаруҳии иштирокчиён дар фарҷом барномаи фарҳангӣ баргузор гардид.