ҶАВОНОН
Душанбе 06 Феврал 2023 07:58
7621

Табрикоти Абдулло Раҳмонзода – раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи байналмилалии волонтёрон

Волонтёрони азиз, ҳампешаҳои арҷманд!

Дар ибтидо ҳамаи Шуморо ба ифтихори Рӯзи байналмилалии волонтёрон муборакбод мегӯям.

Ассамблеяи генералии Созмони Милали Муттаҳид соли 1985 пешниҳод намуда буд, ки дар давлатҳои аъзои ин ниҳод ҳамасола 5 декабр ҳамчун Рӯзи байналмилалии волонтёрон таҷлил карда шавад.

Дар Тоҷикистон низ чун узви Созмони Милали Муттаҳид пайваста дар самти мазкур тадбирҳои зарурӣ роҳандозӣ шуда, ҳар сол дар кишвар панҷуми декабр Рӯзи байналмилалии волонтёрон бошукӯҳ таҷлил карда мешавад.

Бо дастгирии бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фаъолияти волонтёрӣ барои рушди малакаҳои зеҳнӣ, инкишофи маънавӣ, рушди истеъдодҳо, анҷом додани амалҳои хайрхоҳона ва ба ин васила тарбия намудани ҷавонон ва барои соҳибтахассус гаштани онҳо соли 2013 Қонун “Дар бораи фаъолияти волонтёрӣ” қабул гардид ва дар асоси Қарори Ҳукумати Ҷумҳурии Тоҷикистон аз 5 марти соли 2014 Кумитаи кор бо ҷавонон ва варзиш ҳамчун мақоми ваколатдори давлатӣ дар соҳаи фаъолияти волонтёрӣ муайян шуда, сиёсати давлатиро дар ин самт пиёда мекунад.

Таҷлили Рӯзи байналмилалии волонтёрон дар Тоҷикистони соҳибистиқлол далели таваҷҷуҳи Ҳукумати кишвар, бахусус Президенти Ҷумҳурии Тоҷикистон, муҳтарам Эмомалӣ Раҳмон нисбати Шумо ва фаъолияти содиқонаву фидокоронаатон мебошад.

Волонтёрӣ фаъолиятест, ки ҳазорсолаҳо дар миёни мардуми мо бо шаклҳои гуногун вуҷуд дошт ва падарону бобоёни мо ин навъи фаъолиятро бо мақсади ободу зебо гардонидани Ватан, густариши худшиносии миллӣ, дӯст доштани сарзамин ва дасти кӯмак расонидан ба шахсони ниёзманд истифода менамуданд. Дар даврони соҳибистиқлолӣ ҷавонони фаъоли кишвар бо ташаббусҳои наҷибона дар партави сиёсати оқилонаи Пешвои маҳбуби кишвар чун пайравони асили Пешвои миллат дар роҳи ободонию созандагии ба ин навъи фаъолияти ҷамъиятӣ мепардозанд.

Агар аз замони таъсиси клуби волонтёрон дар назди Кумитаи кор бо ҷавонон ва варзиш, яъне 16-уми августи соли 2016-ро ба имрӯз қиёс кунем, мебинем, ки соли 2016 волонтёрон ангӯштшумор буданд, ҳоло бошад, сафи онҳо ба 15 ҳазор нафар расидааст, ки ин худ далели равшани таваҷҷуҳи ҷавонон ба фаъолияти волонтёрӣ мебошад ва ин боиси ифтихори мост.

Имрӯз Сарвари мамлакат ба ҷавонон таваҷҷуҳи махсус дошта, дар ҳалли масъалаҳои гуногун такя ба ин қишри ҷомеа менамоянд. Ин бовариву эътимоди Роҳбари давлат масъулияти баланди мову Шумо ҷавононро баҳри фардои миллат тақозо менамояд, то дар таҳкими Истиқлолияту Ваҳдати миллӣ ва сулҳу суботи сартосарӣ саҳми муносиби хешро гузорем.

Қобили қайд аст, ки фаъолияти волонтёрӣ ба шахси комил шудани наврасону ҷавонон мусоидат намуда, онҳоро инсони башардӯст ба камол мерасонад. Муттаҳид ва сарҷамъ будани волонтёрон дар доираи мақсадҳои хайрхоҳона, кӯмакрасонӣ, ҳамоҳангсозӣ, мусоидат ба ҳалли мушкилиҳои гуногун, аз ҷумла иттилоотӣ, экологӣ, фаҳмондадиҳӣ лоиқи аҳсану дастгирӣ мебошад.

Воқеан ҳам, имрӯз тибқи таҷриба ширкатҳое, ки барои худ мутахассис, корманд меҷӯянд, ба нафароне афзалият медиҳанд, ки таҷрибаи фаъолияти волонтёрӣ доранд ва ин раванд дар Ҷумҳурии Тоҷикистон низ дар даврони соҳибистиқлолии кишвар бомаром татбиқ гардида истодааст.

Фаъолияти бонизоми шумо волонтёрон метавонад, идеяҳои созанда ва ташаббусҳои нав ба навро рӯйи кор орад ва ин иқдомҳо метавонанд дар мавқеи устувор пайдо намудани ҷавонон ва фаъолнокии онҳо дар ҷомеа нақши муҳим бозанд.

Таманно мекунем, ки шумо волонтёрон ҳамеша чун нерӯи пешбаранда, созандагони имрӯзи фардои Тоҷикистони соҳибистиқлол ва пайравони асили Пешвои миллат бошед.

Танҳо ва танҳо бо қалб парастидани ҳар зарра хоку гулу гиёҳи ин сарзамини муқаддас ва ҳисси беинтиҳову беназири ватандӯстӣ имкон медиҳад, ки бар зидди тамоми зуҳуроти номатлуби ҷомеаи ҷаҳонӣ истодагарӣ намоем, масъулияти бузурги таърихӣ ва қарзи пурифтихори фарзандии худро адо намуда, ҷомеаи худро ба пеш ба сӯи ободиву пирӯзиҳои нав устуворона равона созем.

Ман бовар дорам, ки Шумо ҷавони содиқи кишвар аз уҳдаи иҷрои ҳамаи вазифаҳои дар наздатон гузошташуда сарбаландона мебароед ва минбаъд низ кӯшиш мекунед, ки ба нафъи давлату ҷомеа боз ҳам содиқона хизмат намоед. Зеро Шумо дар иҷрои ҳамаи кору масъулият новобаста аз душвориҳои шароити ҷаҳонишавӣ ва таъсири дигар омилҳои беруна, қодиру тавоноед.

Шумо – ҳамчун волонтёрони ташаббускору навовар метавонед, бо кору пайкори намунавӣ, арҷ гузоштан ба анъанаҳои миллию суннатӣ, ҳурмати калонсолон, бахусус падару модар, эҳтиром ба рамзҳои давлатӣ ва муқаддасоти миллӣ, дӯстию рафоқат, ору номуси ватандорӣ ва ҳисси меҳанпарастиро дар ниҳоди ҳамсолону ҳамкасбони худ талқин намоед.

Ба Шумо ҷавонони хушиқбол, ки дар баргузории ҳама гуна чорабиниҳои сиёсӣ аз он ҷумла, интихоботи Президенти кишварамон, ки санаи 11 октябри соли 2020 дар фазои сулҳу субот ва ҳамрайъии мову Шумо ҷавонон доир шуд, инчунин чорабиниҳои фарҳангиву фароғатӣ, илмӣ-маърифатӣ, варзишӣ-оммавӣ ва чорабиниҳои сатҳи байналмилалӣ саҳми худро гузошта, фаъолона ширкат варзидед, изҳори сипоси худро баён менамоям.

Ба унвони номи пуршарафи волонтёрӣ ва пайравони Пешвои миллат содиқ монед ва ин шиор, яъне “Волонтёрӣ шараф аст” бояд шиори зиндагии ҳар яки шумо бошад.

Дар охир, бори дигар тамоми ҷавононеро, ки дар дохил ва хориҷи кишвар ба фаъолияти волонтёрӣ машғуланд, аз номи кулли ҷавонону варзишгарон бо Рӯзи байналмилалии волонтёрон табрику таҳният намуда, бароятон хушбахтиву некномӣ, сиҳатмандиву хушрӯзӣ ва дар фаъолияти волонтёриву корҳои рӯзмараатон бурдбориҳоро таманно дорам.

Ҳамеша сарбаланду пирӯз ва пайравони асили Пешвои миллат бошед.

Рӯзи байналмилалии волонтёрон муборак – пайравони Пешвои муаззами миллат!

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 1 2 3 4 5

Феврал 2023 c.