Сухане чанд аз фаъолияти онҳо дар Тоҷикистон

Волонтёр шахсест, ки кори хайрро бемузд иҷро мекунаду ҳамеша дар хизмати халқу кишвар аст. Волонтёр шахси инсондӯст, накӯкор, фаъол ва дӯстдори миллат аст.

Дар кишвари мо Кумитаи кор бо ҷавонон ва варзиши назди Ҳукумати Ҷумҳурии Тоҷикистон як дабистони бузург барои волонтёрон буда, шумораи зиёди ҷавони фаъолро ба мактаби худ ҷалб кардааст.

Бояд қайд кард, ки имрӯз теъдоди волонтёрони Кумитаи кор бо ҷавонон ва варзиш нисбат ба солҳои қаблӣ хеле афзудааст. Ҳоло сафи волонтёрони назди кумита дар давоми қариб 5 сол ба 15 ҳазор нафар расидааст. Ва ҳамин аст, ки волонтёрон аз иштирок дар маъракаҳои хурд то ба маъракаи бузурги сиёсӣ-итихоботи президентӣ расида, аз ҷониби нозирони байналмилалӣ баҳои хуб гирифтанд.

Дар интихоботи парлумонӣ ва интихоботи навбатии президентӣ фаъолияти фаъолонаи волонтёрон хуб ба назар мерасид. Онҳо дар ин чорабиниҳо барои мардум роҳнамои беминнат буданд. Бино ба оморҳои мавҷудбуда дар интихоботи парлумонӣ 5 ҳазор ва дар интихоботи президентӣ 10 ҳазор волонтёр иштирок ва саҳми худро гузоштанд, ки ин аввалин иштироки онҳо дар чунин маъракаи муҳими сиёсии кишвар буд.
Дар раванди интихоботи навбатии Президенти Ҷумҳурии Тоҷикистон бошад, волонтёронро ба ҳайси хизматрасон сафарбар намуданд, ки онҳо дар баробари иштирок дар ин маъракаи муҳими сиёсӣ барои баланд бардоштани донишҳои сиёсии ҷавонон ва маърифати ҳуқуқии онҳо заминагузорӣ намуданд.

Кумита вобаста ба иштироки волонтёрон дар интихобот ҳайати волонтёрони тарғиботчӣ, хизматрасон ва волонтёрони забондонро омода намуд, ки онҳо дар раванди интихоботи президентии кишвар вазифаҳои мухталифро иҷро намуданд. Яъне ҳайати волонтёрони тарғиботчӣ то баргузории интихобот масъалаҳои марбут ба интихоботи Президенти Ҷумҳурии Тоҷикистонро миёни мардум тавассути аксияву чорабиниҳо ва баргузории тренингу семинарҳои омӯзишӣ ба роҳ монданд. Инчунин фаъолияти онҳо дар сомонаву шабакаҳои иҷтимоӣ ба таври васеъ ба роҳ монда шуд. Ҳайати волонтёрони забондон ҳайати мушоҳидони байналмилалиро, ки аз ҷониби созмонҳои байналмилалӣ ба Тоҷикистон ташриф оварда буданд, роҳнамоӣ намуда, масъалаҳои муҳими интихоботи Президенти Ҷумҳурии Тоҷикистонро ба ҳайати мушоҳидони байналмилалӣ тарҷума намудаву ба онҳо дар рафти назорат аз раванди интихобот роҳнамоӣ намуданд.

Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар низ аз фаъолияти волонтёрон изҳори қаноатмандӣ намуда, чанде пеш зимни як нишаст ба фаъолияти онҳо баҳои баланд дод. Ва раиси кумита рушди волонтёриро дар рушд бахшидани соҳаҳои гуногуни хоҷагии халқ хеле муҳим арзёбӣ кард.
Волонтёрон низ ба рушд кардани ҳаракати волонтёрӣ нигоҳи нек доранд ва мегӯянд, волонтёрӣ заминаи хуб барои рушди ҳар ҷавон метавонад бошад.

Динора Ҷабборзода, роҳбари Маҳфили адибони ҷавони навқаламу эҷодкор бар ин назар аст, ки фаъолияти волонтёрӣ метавонад, ба ҷавонон барои рушди минбаъда пару бол бахшад. Ӯ зимни суҳбат бо мо гуфт, ки Маҳфили адибони ҷавони навқаламу эҷодкор, ки аз ҳисоби волонтёрони соҳибистеъдод ташкил ёфтааст, бо ҷалби ҷавонони фаъол пайваста барномаҳои гуногуни адабиву маърифатӣ ва барномаҳои театриро таҳия ва пешниҳоди бинандаи хеш мегардонад.

- Дар давоми соли 2020 аз ҷониби маҳфил бо мақсади роҳандозӣ намудани идеяҳои талқинкунанда ҷиҳати ҳавасмандгардонии ҷавонон дар таҳияи барномаҳои театрӣ ва дигар эҷодиёти фарҳангиву ҳунармандӣ бо мақсади муаррифии фарҳанги кишвар ва истеъдоди волои ҳунармандии миллати тоҷик як зумра чорабиниҳои фарҳангию фароғатӣ, адабиву маърифатӣ, тарғиботиву оммавӣ миёни аҳолии кишвар ташкил ва баргузор карда шуд. Аз ҷумла дар озмуни “Фурӯғи субҳи доноӣ китоб аст” 18 нафар адибони ҷавон, волонтёрони фаъол ва ҷавонони фаъолу соҳибистеъдод иштирок намуда, 8 нафари онҳо дар озмуни мазкур ғолибият ба даст оварда, сазовори ҷойҳои ифтихорӣ ва намоён гардиданд,- гуфт Динора.

Мақсад аз мисол оварданҳои худро Динора дар он медонад, ки маҳз ҳамин фаъолият буд, ки онҳо тавонистанд, худро то қадри имкон муаррифӣ кунанд ва зарфиятҳои худро ба ҷомеа пешниҳод намоянд.
Нурзода Раббонӣ, роҳбари волонтёрони ТҶ “Пайравони Пешвои миллат” мегӯяд, ки давоми соли сипаришуда, дар асоси дастуру супоришҳои Пешвои муаззами миллат муҳтарам Эмомалӣ Раҳмон ва дастгириҳои пайвастаи раиси Ташкилоти ҷамъиятии “Пайравони Пешвои миллат” Раҳмонзода Абдулло аз ҷониби волонтёрони ташкилот як қатор аксияҳо, ҳашарҳои дастаҷамъона ва инчунин барои рушду тақвияти соҳаи волонтёрӣ семинар-тренингҳо баргузор карда шуд. Ӯ бо ифтихор мегӯяд, ки имрӯз волонтёрон барои ҷомеа сабукиҳои бештаре меоранд ва дар баробари кормандон барои ободии меҳан талош доранд.

Волонтёрон дар минтақаҳо низ аз рушди ин намуди фаъолият изҳори хушнудӣ мекунанд. Чуноне ки Ганҷина, ёрдамчии роҳбари волонтёрони Ташкилоти ҷамъиятии “Пайравони Пешвои миллат” дар ноҳияи Рашт дар бораи фаъолияти худ ҳамчун волонтёри фаъол гуфт: “Пеш аз ҳама фаъолияти волонтёрӣ ҷавононро ба роҳи рост, ватандӯстиву ободкорӣ ва маърифат равона мекунад. Боиси хушнудист, ки ман ба ҳамин гурӯҳи шахсиятҳо шомил ҳастам ва ҳамеша барои ватани азизи худ хизмат мекунам. Маҳз бо кори хайрхоҳиам дар байни ҷомеа, дӯстон ва диёрам мавқеи хуб пайдо намудам. Волонтёр будан мояи ифтихор ва сарбаландист”.
Ҳангоми суҳбат бо дигар волонтёрон низ ба мо маълум гардид, ки ҳар яке аз рушд ёфтани фаъолияти волонтёрӣ изҳори хушнудӣ мекунанд. Мо низ барои рушди фаъолияти эшон барор мехоҳем.