Зери ин унвон имрӯз бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи байналмилаллии волонтёрон ҳамоиш доир гардид.

Дар ҳамоиши мазкур Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Маликшо Неъмат, раиси Иттифоқҳои касабаи мустақили Тоҷикистон, Абдураҳмон Хонов, роҳбари дастгоҳи марказии КИ ҲХДТ, Шоҳзод Раҳимзода, сардори Раёсати кор бо ҷавонон ва варзиши шаҳри Душанбе, сардорони бахшҳои кор бо ҷавонони макотиби олии кишвар ва волонтёрон ширкату суханронӣ намуданд.

Ҳамоиши мазкур бо хондани Суруди миллӣ ба таври зинда аз ҷониби иштирокчиён ифтитоҳ гардид. Баъд аз ифтитоҳи расмии чорабинӣ Абдулло Раҳмонзода волонтёронро бахшида ба Рӯзи умумиҷаҳонии волонтёрон табрик намуда, иброз дошт, ки таҷлили Рӯзи байналмилаллии волонтёрон дар Тоҷикистон далели таваҷҷуҳи бевоситаи Ҳукумати кишвар, бахусус Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикитостон муҳтарам Эмомалӣ Раҳмон нисбати волонтёрон мебошад:

- Ин аст, ки волонтёрон имрӯз дар тамоми чорабиниҳои давлатӣ иштирок намудаву саҳми худро мегузоранд. Махсусан волонтёрон дар даври интихоботҳои парлумонӣ ва президентӣ фаъолияти хайрхоҳонаи худро ба роҳ монда, ба шахсони маъюб ва пиронсол дар ин маъракаи муҳими сиёсӣ кӯмакҳо расонданд. Агар ба таърихи волонтёрӣ назар афканем, ҳанӯз соли 1987 теъдоди умумии волонтёрон дар ҷаҳон 80 миллион нафарро ташкил менамуд, ин нишондод дар соли 2021 ба 119 миллион нафар расидааст. Дар Тоҷикистон сафи волонтёрон ба беш аз 15 ҳазор нафар расидааст. Волонтёрони тоҷик ҳатто дар Федератсияи Руссия аз ҷониби В.Путин бо ифтихорнома сарфароз гардидаанд,- иброз дошт А. Раҳмонзода.

Баъдан Маликшо Неъматзода, раиси Иттифоқҳои касабаи мустақили Тоҷикистон баромад намуда, иброз дошт, ки волонтёрӣ завқ аст, майли дил аст ва касе нафари накукорро аз роҳ зада наметавонад.

- Роҳе ки волонтёрон интихоб намудаанд, барои ин миллат ва барои ин сарзамин як кори хайр, инсонгарона ва меҳандӯстона аст, ки ин амал амали нав нест, амалест, ки ҳазорсолҳо дар хуни мардуми тоҷик буд. Имрӯз агар ба чандсоли ахир назар афаканем ҳам теъдоди волонтёрон зиёд гардидааст ва ҳам онҳо дар чорабиниҳои сатҳи минтақавию ҷумҳуриявӣ фаъолона ширкат меварзанд, ки ин аз рушд намудани фаъолияти ин ҷавонони хайрхоҳ ва меҳандӯст маншаъ мегирад, - гуфт М. Неъмат.

Дар идомаи чорабинӣ баромадкунандагон аз фаъолияти имрӯзаи волонтёрон, саҳми онҳо дар чорабиниҳои сиёсию фарҳангии кишвар маърӯзаҳо ироа намуданд.

Баъд аз ироаи маърӯзаҳо як қатор волонтёрони фаъоли аз ҷониби раиси Кумитаи кор бо ҷавонон ва варзиш бо сипоснома ва тӯҳфаҳои хотиравӣ қадрдонӣ гардиданд.

Дар охири ҳамоиш Муроҷиатномаи волонтёрони Кумитаи кор бо ҷавонон ва варзиш бахшида ба Рӯзи байналмилаллии волонтёрон қироат гардид.