Боиси ифтихор аст, ки имрӯзҳо дар сафҳои Қувваҳои Мусаллаҳи ҷумҳурӣ ҳазорҳо ҷавонони аз ҷиҳати ҷисмонӣ обутобëфта, зираку чолок ва дорои тарбияи баланди ватандӯстиву ифтихори миллӣ сарбаландона адои хизмат мекунанд, ки бо нерӯи худ дар таҳкими сулҳу оромии кишварамон ҳиссаи муносибати хешро гузошта истодаанд.

Қобили зикр аст, ки фаъолияти волонтёрӣ имрӯзҳо дар кишвари азизамон рушд намуда истодааст ва ин навъи фаъолияти ҷамъиятӣ дар замири ҷавонони кишвар ҳисси ватандӯстиро ғанӣ мегардонад. Ин аст, ки Роҳбари Клуби волонтёрони вилояти Хатлон Ҳаитов Тоҷиддин пас аз хатми донишгоҳ ва волонтëри Раëсати кор бо ҷавонон ва варзиши вилояти Суғд Умаров Содиқҷон имрӯз ихтиёран ба сафи Қувваҳои Мусаллаҳи Ҷумҳурии Тоҷикистон барои адои хизмат рафтанд.

Дар маросими гусели волонтёрон даҳо нафар ба видои эшон баромада, бо гулу гулдастаҳо эшонро гусел намуданд. Ҳамзамон, барои фаъолияти пурсамар ва иштироки фаъолона дар корҳои ҷамъиятӣ ба онҳо аз ҷониби раёсатҳои кор бо ҷавонон ва варзиш сипосномаҳо тақдим гардид.

Ҷавонони шарафманду ватандӯст бояд анъанаҳои беҳтарини ҳарбии ниëгонро сармашқи кори худ қарор дода, дар ҳифзи якпорчагии марзу буми кишвар, таъмини амнияти он, боло бурдани обрӯю эътибори Тоҷикистон дар арсаи ҷаҳонӣ саҳми босазо гузоранд.

Ватан – Модар нигарони дасту ҳиммату бозӯи мардонаи шумост.

Волонтëрӣ шараф аст, волонтёр мешавем!