ҶАВОНОН
Якшанбе 25 Октябр 2020 12:51
7469
Сол то сол фаъолияти волонтёрӣ дар кишвар рушд намуда, саҳми волонтёрон дар ҳаёти сиёсию фарҳангӣ хубтару беҳтар мегардад. Ин аст, ки волонтёрон ба таври ихтиёрӣ, ки яке аз принсипҳои фаъолияти волонтёрӣ ба шумор меравад, дар маъракаҳои муҳими фарҳангиву сиёсӣ, аз ҷумла интихоботҳои парлумонию президентӣ фаъолона ширкат мекунанду саҳми худро дар ҳаёти сиёсии мамлакат, инчунин пешрафти давлату миллат мегузоранд.

Дар интихоботи парлумонӣ ва интихоботи навбатии президентӣ фаъолияти фаъолонаи волонтёрон ба назар мерасид. Онҳо дар ин чорабиниҳо барои мардум роҳнамои беминнат буданд. Бино ба оморҳои мавҷудбуда дар интихоботи парлумонӣ 5 ҳазор ва дар интихоботи президентӣ 10 ҳазор волонтёр иштирок ва саҳми худро гузоштанд, ки ин аввалин иштироки онҳо дар чунин маъракаи сиёсии кишвар буд.

Салимзода Каримҷон, роҳбари волонтёрони Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни суҳбати вижае вобаста ба иштирок ва саҳми арзандаи волонтёрон дар интихоботи президентӣ иброз дошт, ки Кумитаи кор бо ҷавонон ва варзиш дар раванди интихоботи навбатии Президенти Ҷумҳурии Тоҷикистон волонтёронро ба ҳайси хизматрасон сафарбар намуд, ки онҳо дар баробари иштирок дар ин маъракаи муҳими сиёсӣ барои баланд бардоштани донишҳои сиёсии ҷавонон ва маърифати ҳуқуқии онҳо заминагузорӣ намуданд.

Ҳамчунин ӯ афзуд: “Кумита дар тамоми ҳавзаҳои интихоботии шаҳру ноҳияҳои ҷумҳурӣ волонтёронро сафарбар намуда буд, ки онҳо саҳми арзандаи худро дар ҳаёти сиёсии кишвар гузоштанд. Кумита вобаста ба иштироки волонтёрон дар интихобот ҳайати волонтёрони тарғиботчӣ, хизматрасон ва волонтёрони забондонро омода намуд, ки онҳо дар раванди интихоботи президентии кишвар вазифаҳои мухталифро иҷро намуданд. Яъне ҳайати волонтёрони тарғиботчӣ то баргузории интихобот масъалаҳои марбут ба интихоботи Президенти Ҷумҳурии Тоҷикистонро миёни мардум тавассути аксияву чорабиниҳо ва баргузории тренингу семинарҳои омӯзишӣ ба роҳ монданд. Инчунин фаъолияти онҳо дар сомонаву шабакаҳои иҷтимоӣ ба таври васеъ ба роҳ монда шуд. Ҳайати волонтёрони забондон бошанд, ҳайати мушоҳидони байналмилалиро, ки аз ҷониби созмонҳои байналмилалӣ ба Тоҷикистон ташриф оварда буданд, роҳнамоӣ намуда, масъалаҳои муҳими интихоботи Президенти Ҷумҳуриии Тоҷикистонро ба ҳайати мушоҳидони байналмилалӣ тарҷума намудаву ба онҳо дар рафти назорат аз раванди интихобот роҳнамоӣ намуданд”.

Бояд гуфт, ки фаъолияти волонтёрон дар ин рӯз баръало мушоҳида мешуд, зеро яке мардумро роҳнамо ва дигаре маъюбону кӯдаконро ба хонаашон мебурданд. Шаҳзода Ашуралиева аз ҷумлаи он волонтёронест, ки дар рӯзи интихобот ба участкаи интихоботии рақами 4 ҳавзаи рақами 3-и ноҳияи Шоҳмансур омада, ба мардуми кишварамон роҳбаладӣ мекард ва он чизеро ки дар рафти интихобот баъзе сокинон сарфаҳм намерафтанд, аз ӯ пурсон мешуданд. Ӯ аллакай панҷ сол мешавад, ки ҳамчун волонтёр дар ҳаёти сиёсии кишвар иштирок ва саҳми худро мегузорад. Ӯ мегӯяд, қаблан дар интихоботҳои парлумонӣ иштирок кардааст, вале дар интихоботи президентӣ бори аввал аст, ки ҳам овоз медиҳад ва ҳам ҳамчун волонтёр саҳми худро мегузорад.

- Мо, волонтёрон аз соати 5:50 дар участкаи интихоботӣ қарор гирифта, аллакай хизматрасониро миёни мардум ба роҳ мондем. Кори мо аз садо додани Суруди миллӣ ибтидо гирифт. Аз соати 6:10 аллакай мардум ба участкаи интихоботӣ омаданд. Мо онҳоро роҳнамоӣ кардем. Чун дар аввал мардум зиёд омад, мо ба онҳо фаҳмонидем, ки масофаи иҷтимоиро риоя намоянд. Ғайр аз ин, ба маъюбон ва кӯдаконе, ки ҳамроҳи модарашон омаданд, кӯмаки худро расонидем”.

Ба гуфти роҳбари волонтёрони Кумитаи кор бо ҷавонон ва варзиш Салимзода Каримҷон иштироки волонтёрон дар интихоботи президентӣ ва парлумонӣ таҷрибаҳои аввал буда, дар аксар кишварҳо чунин таҷрибаҳо дида намешавад. Ва ин аст, ки аз ҷониби мушоҳидони байналмилалӣ фаъолияти волонтёрон баҳои баланд гирифт.

- Дар доираи Созмони Ҳамкориҳои Шанхай таҷрибаи Тоҷикистон дар самти иштироки волонтёрон дар интихоботи президентӣ аввалин маротиба аст ва ин таҷрибаро Ҷумҳурии Ӯзбекистон аллакай истифода карда истодааст ва дар интихоботи навбатии Ҷумҳурии Ӯзбекистон дар назар дошта шудааст, ки волонтёрон ба ҳайси хизматрасон иштирок кунанд,-гуфт номбурда.

Бояд гуфт, ки мақоми ваколатдор дар самти кор бо волонтёрон - Кумитаи кор бо ҷавонон ва варзиши кишвар, дар асоси Қонуни Ҷумҳурии Тоҷикистон “Дар бораи фаъолияти волонтёрӣ” корро миёни волотёрон рӯз аз рӯз беҳтар намуда, волотёрон марҳила ба марҳила рушду такомул меёбанд.

- Тибқи оморҳои расмӣ дар ҷаҳон зиёда аз 1 миллион сокинони сайёра ба ҳайси волонтёр фаъолият менамоянд. Ва ҳавасмандгардонии онҳо бо лагеру семинарҳо ва сафарҳои гуногун ва дигар қадрдониҳо сурат мегирад. Кумитаи кор бо ҷавонон ва варзиш низ дар ин самт ҳамқадами замон буда, барои ҳавасмандгардонии волонтёрон ҳамин гуна семинару омӯзишҳо, сафарҳо ва озмунҳоро ба роҳ мемонад, ки ин метавонад барои ҳавасманд гардидани волонтёрон хизмат кунад,-афзуд С. Каримзода.

Бояд қайд кард, ки имрӯз теъдоди волонтёрони Кумитаи кор бо ҷавонон ва варзиши назди Ҳукумати Ҷумҳурии Тоҷикистон нисбат ба солҳои қаблӣ даҳчанд гардидааст. Агар аз замони таъсиси клуби волонтёрон дар назди Кумитаи кор бо ҷавонон ва варзиш, яъне 16-уми августи соли 2016-ро ба имрӯз қиёс кунем, мебинем, ки соли 2016 волонтёрон ангӯштшумор буданд, ҳоло бошад, сафи онҳо ба 15 ҳазор нафар расидааст. Ва ҳамин аст, ки волонтёрон аз иштирок дар маъракаҳои хурд то ба маъракаи бузурги сиёсӣ-итихоботи президентӣ расида, аз ҷониби нозирони байналмилалӣ баҳои хуб гирифтанд.

Ин буд, ки зимни нишасти матбуотии онлайнӣ дабири Созмони Ҳамкории Шанхай (СҲШ) Владимир Норов вобаста ба интихоботи навбатии Президенти Ҷумҳурии Тоҷикистон суханронӣ намуда, аз фаъолият ва хизматрасонии волонтёрон дар ин маъракаи муҳимми сиёсӣ зикр намуданд.

- Барои мусоидат дар татбиқи ҳуқуқҳои интихоботии шаҳрвандони маъюб КМИР дар якҷоягӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон 10 000 ихтиёриёнро ҷалб кард, ки дар сабти овоздиҳандагон, паҳн намудани маълумот дар бораи интихоботи президентӣ ва мусоидат дар интихобот ба пиронсолон ва шахсони маъюб кӯмак карданд. Аз ҷумла, волонтёрон ба намояндагиҳои гуногуни байналмилалӣ оид ба мушоҳидаи интихоботи Президенти Ҷумҳурии Тоҷикистон кӯмаки зарурӣ расониданд”,- афзуд Владимир Норов.

Хулоса, фаъолияти волонтёрӣ ҳарчанд дар Ҷумҳурии Тоҷикистон фаъолияти нав ҳам бошад, вале то дараҷае рушд намудаву иштироки онҳо то ба маъракаҳои муҳими сиёсӣ - интихоботи парлумонӣ ва интихоботи президентӣ омада расид. Месазад, дар ин замина мо низ аз эшон қадршиносӣ кунем ва дар фаъолиятҳои минбаъдаашон то қадри имкон тавонем, дастгиру мададрасон бошем.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
28 29 30 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

Октябр 2020 c.