Имрӯз аксари соҳаҳо донистани забонҳои хориҷиро дар баробари забони модарӣ талаб мекунанд. Он дигар интихоб нест, балки дар замони ҷаҳонишавӣ зарурат аст. Имрӯз шахсе, ки якчанд забони хориҷиро хуб медонаду озодона муошират карда метавонад, имконияти бештаре дорад барои рушди самти хеш.

Омӯзиши забонҳои хориҷӣ яке аз масъалаҳои мубрам дар соҳаи маориф ба ҳисоб меравад. Ин нукта дар паёмҳои ҳамасолаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид мегардад. Аз ин ҷост, ки баҳри рушди омӯзиши забонҳои хориҷӣ, хусусан забонҳои русиву англисӣ аз ҷониби Ҳукумати Ҷумҳурии Тоҷикистон ҳамеша тадбирҳои мушаххас андешида мешавад. Қабули “Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон то соли 2030” шаҳодати гуфтаҳои болост.

Дар асри рақобати истеъдодҳо танҳо дониши хуб кифоя нест, балки донистани забони хориҷӣ низ ҳатмист. Аз ин рӯ, омӯзиши забони хориҷӣ хеле муҳим ва саривақтӣ барои ҷавонон аст, зеро бе донистани забони хориҷӣ онҳо наметавонанд, ки пайи расидан ба ҳадаф ва орзуҳои худ амал кунанд.

Дар мактабҳо омӯзиши забони хориҷӣ аксаран назариявист. Усулҳои куҳнаи таълим, камбудии омӯзгорони соҳибтаҷриба, маводи таълимии номуосир низ зиёд ба назар мерасанд. Ин сабабҳое мебошанд, ки хонандагон наметавонанд дар мактаби миёна забонҳои хориҷиро ба таври зарурӣ аз худ кунанд.

Хуршед Мавлонов, котиби матбуотии Вазорати маориф ва илм дар ин маврид гуфт: “Вазорати маориф ва илми Ҷумҳурии Тоҷикистон масъалаи омӯзиши забонҳои хориҷиро ҳамчун яке аз самтҳои афзалиятноки сиёсати маориф арзёбӣ мекунад. Мушкилоте, ки баъзе хонандагон ҳангоми хатми мактаб дар сатҳи кофӣ аз худ кардани забонҳои хориҷӣ доранд, омилҳои гуногун дорад, аз ҷумла, фарқият дар имкониятҳои инфрасохторӣ, дастрасӣ ба омӯзгорони баландихтисос, муҳити омӯзиш ва сатҳи машғулияти шахсии худи хонандагон. Бо вуҷуди ин, Вазорат пайваста дар самти такмили низоми таълими забонҳои хориҷӣ тадбирҳои мушаххас меандешад. Аз ҷумла, тайи солҳои охир барномаҳои таълимӣ ва китобҳои дарсӣ нав карда шуданд, курсҳои такмили ихтисоси омӯзгорон ба роҳ монда шуданд ва дар ҳамкорӣ бо шарикони рушд лоиҳаҳои гуногун амалӣ мегарданд. Қобили зикр аст, ки масъалаи баланд бардоштани сатҳи донистани забонҳои хориҷӣ як равандест, ки на танҳо ба фаъолияти муассисаҳои таълимӣ, балки ба иштироки фаъолонаи хонанда, дастгирии оила ва муҳити умумии ҷомеа низ вобастагӣ дорад”.

Матлуба, сокини пойтахт мехоҳад, ки фарзандашро баъд аз хатми мактаби миёна тавассути барномаи “Аусбулдинг” барои таҳсил ба хориҷа равон кунад, вале мебинад, ки дар мактаби миёна ӯ дар омӯхтани забони англисӣ азият мекашад.

- Бинобар ин, ҳоло писарамро барои омӯхтани забони англисӣ ва немисӣ ба марказҳои забономузӣ овардам, то сатҳи забондониаш беҳтар гардида, барои таҳсили ояндааш, ки дар хориҷа онро идома додан мехоҳад, омодагии ҷиддӣ бинад. Албатта, нархи курсҳои омӯзишӣ хеле баланд аст, зеро барои курси забони англисӣ 400 сомонӣ ва барои забони немисӣ бошад, 800 сомонӣ моҳона пардохт мекунам. Нархи марказҳои омӯзишӣ хеле гарон аст, вале маҷбур ҳастам, зеро ояндаи фарзандамро хуб дидан мехоҳам”, - гуфт Матлуба, сокини пойтахт.

Зарурати таъсиси марказҳои омӯзишии забонҳои хориҷии ройгон барои ҷавонон бисёр муҳим аст, махсусан дар замоне, ки талаботи хонандагон ва ҷавонон ба таҳсил меафзояд.

Миҷгона ҳоло забонҳои хориҷиро мустақилона бо барномаҳои (Duoling babbel) видеоҳои Youtube, тамошои сериалҳо, гӯш кардани мусиқии хориҷӣ ва ҳамсуҳбат шудан, меомӯзад. Ӯ мегӯяд: “Дар мактаб ба мо танҳо грамматика меомӯзанд, вале муоширатро на. Ҳоло бо донистани забони хориҷӣ ҷавонон метавонанд онлайнӣ кор карда, маблағи хубро ба даст оранд. Барои ин зиёд заҳмат мекашам, то орзуҳоям амалӣ гарданд”.

Илҳом Ибодуллоев, роҳбари маркази забономӯзии ТМС роҷеъ ба мавзуи мавриди назар иброз дошт: “Дар ҷаҳони имрӯза донистани як ё якчанд забони хориҷӣ на танҳо як афзалият, балки зарурат шудааст. Ҷавононе, ки ба забономӯзӣ таваҷҷуҳ доранд, имкониятҳои васеътари таҳсил, кор ва рушди шахсиятро ба даст меоранд. Таҷрибаи мо дар маркази забономӯзӣ нишон медиҳад, ки аксари ҷавонон бо ҳаваси зиёд ва руҳияи баланди омузишӣ ба дарс меоянд”.

Хулоса, ҷавонон бояд донанд, ҳар як забоне ки меомӯзанд, барои ояндаи онҳо як дарвозаи наверо боз мекунад.

Уғулой ҚУТБИДДИНЗОДА,
коромӯзи “ҶТ”