Муваффақияти ҳар як инсон дар дасти худаш аст ва агар шахс кӯшишу заҳматро пеша кунад, ҳатман ба қуллаҳои баланд мерасад. Омӯзиши илму ҳунар низ ҷузъе аз муваффақиятҳои инсон аст ва қаҳрамони мо маҳз ба воситаи забондонии худ тавонист, ки дар дигар кишвар комёб гардад.

Раҳима Азимшоева аз хурдӣ орзу дошт, забонҳои хориҷӣ, бахусус англисиро хуб аз бар намояду дар оянда ба хориҷи кишвар сафар карда, хостаҳои худро он ҷо бароварда кунад. Ӯ вақте синфи шаш мехонд, ҳамроҳи волидонаш ба Федератсияи Русия меравад. Мактаби миёнаро дар он ҷо хатм карда, баъдан ба факултети эконимикаи Донишгоҳи давлатии Москва ба номи В.С. Черномирдин дохил мешавад. Орзуи ягонаи Раҳима он буд, ки донишгоҳро бомуваффақият хатм кунаду дар ин соҳа кору фаъолият намояд. Аммо бо мурури замон дар қалби ӯ меҳри беандоза нисбати ороиши бонувон пайдо гардид. Ӯ дар вақтҳои холигиаш ба омӯзиши ин касб машғул мешуд. Ҳамин тавр, ин касбро ба хубӣ аз худ мекунад.

Баъди хатми донишгоҳ на фақат иқтисодчӣ, балки як мутахассиси хуб дар самти ороиши бонувон гардид. Ва бо кумаки падару модараш ӯ барои худ кошонаи ҳусн кушода, дар муддати кӯтоҳ мизоҷони зиёд пайдо намуд.

“Пеш аз кушодани кошонаи ҳусн ман бо калонсолон суҳбат намудам ва ростӣ дар дилам тарс пайдо шуд, ки оё ман аз ӯҳдаи ин кор мебароям ё на? Ба худам қавл додам, ки бояд роҳи ҳалли инро ёбам. Ба ёру дӯстонам занг зада гуфтам, ки маро дастгирӣ кунанд. Ба шаҳрвандоне, ки аз Тоҷикистон дар ин ҷо ҳастанд, дар бораи кушодашавии кошонаи ҳуснам бигӯянд, то ба ман муроҷиат намоянд. Ҳамин тавр, мизоҷони зиёд пайдо намуда, ба онҳо бо нархи дастрас хизмат мекардам”, - гуфт ҳамсуҳбатамон.

Раҳима аз хурдӣ, ки ба омӯхтани забонҳои хориҷӣ шавқи зиёд дошт, кӯшиш мекард, ки аз омӯхтани забони англисӣ дур намонад. Дар баробари ин, барояш донистани зиндагию фарҳанги дигар халқҳо аҷиб буд.

“Пайваста омӯхтани забонро низ ҷузъе аз шуғлҳои муҳими худ медонистам, бинобар ин пас аз оиладор шуданам низ омӯхтани забонро идома додам.

Аз соли 2019 то имрӯз Раҳима ҳамроҳи хонаводааш дар шаҳри Ню-Йорки Амрико зиндагӣ мекунад. Ӯ мегӯяд, рӯзҳои аввали дар он ҷо қарор доштан, барояшон душвор буд. Мутобиқ шудан ба ҷойи нав ва пайдо намудани ҷойи кор барояш мушкилӣ пеш меовард, аммо пеша намудани сабру таҳаммул ва бовар доштан ба худ ӯро тавонист, дар ҷодаи интихобнамудааш муваффақ гардонад. Азбаски Раҳима бо забони англисӣ озодона суҳбат карда метавонист ва дар ин маврид танқисие надошт. Ӯ тавонист, дар Амрико низ кошонаи ҳусн кушояд ва фаъолияташро идома диҳад.

Дар кӯтоҳтарин муддат Раҳима ҳамроҳи шавҳараш соҳиби ҷойи кор шуданд. Шавҳараш дар яке аз тарабхонаҳо ёрдамчии ошпаз шуда, кор мекунад.

Раҳима имрӯз худро хушбахт меҳисобад, зеро ӯ тавонист ҳамаи орзую умедҳояшро бароварда кунад. Ӯ ба дигар ҷавонони тоҷик маслиҳат медиҳад, ки аз зиндагӣ ҳаргиз ноумед нашаванд ва ҳамеша дар талош бошанд.