ҶАВОНОН
Чоршанбе 22 Август 2018 04:54
4696
Бахшида ба Соли рушди сайёҳӣ ва ҳунарҳои мардумӣ бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Вазорати корҳои дохилии кишвар ва таҳти сарпарастии Президенти Федератсияи футболи Тоҷикистон муҳтарам Рустами Эмомалӣ аз 16 то 19 июл дар Вилояти Мухтори Кӯҳистони Бадахшон Форуми ҷумҳуриявии ҷавонони Тоҷикистон таҳти унвони “Зиракии сиёсии ҷавонон - омили рушду суботи кишвар” доир гардид.

Дар форуми мазкур ҷавонони касбу кори гуногун, олимон ва муҳаққиқони ҷавон, намояндагони вазорату идораҳо иштирок намуданд.

Корвони ҷавонони фаъоли кишвар, ки беш аз 100 нафарро ташкил медод, бо мақсади иштирок дар форуми ҷавонон ва боздид намудан аз мавзеъҳои таърихию фарҳангӣ, манзараҳои дилкушои ВМКБ ва ошно гардидан бо суннатҳои неки мардуми вилояти мазкур ба ин гӯшаи зебои Ватан сафар намуданд.

Иштирокчиёни форум нахуст дар назди бинои Кумитаи кор бо ҷавонон ва варзиш бо Абдуллозода Аҳтам Рустам, раиси Кумитаи кор бо ҷавонон ва варзиш мулоқот намуданд.

Зимни сафар ба самти ВМКБ аввалан иштирокчиёни форумро дар шаҳри бостонии Кӯлоб ҷавонони касбу кори гуногун ва фаъолони шаҳр бо самимияти беандоза пешвоз гирифта, сипас баҳри ошноӣ пайдо намудан бо таъриху тамаддуни куҳани минтақа иштирокчиён аз осорхонаи таърихии 2700-солагии шаҳри Кӯлоб ва оромгоҳи Мир Саид Алии Ҳамадонӣ дидан карданд.

Дар ноҳияи Дарвоз низ меҳмононро намояндагони мақомоти иҷроияи ҳокимияти давлатии ноҳия ва пиру ҷавон дар фазои идона бо гулу гулдаста ва самимияти беандоза пешвоз гирифта, ба ифтихорашон шоми ҳамон рӯз дар истироҳатгоҳи “Чорчаман” – и ноҳия барномаи фарҳангӣ-фароғатии “Шоми ҷавонӣ”-ро таҳти унвони “Ҷавонӣ мехурушад мисли дарё” доир намуданд.

Санаи 17 июл, иштирокчиёни форуми ҷумҳуриявиро дар ноҳияи Ванҷ истиқбол намуданд. Зимни суҳбату вохӯриҳо бо ҷавонони ноҳия иштирокчиёни форум барои худ дӯстони нав пайдо намуда, аз ҳаёти ҷавонони ноҳия аз наздик шинос шуданд. Инчунин дар доираи сафар иштирокчиён ба аёдати ҷавонони имконияташон маҳдуди ноҳияи Ванҷ рафта, ҳамчун нишони дӯстӣ ба онҳо туҳфаҳои хотиравии Кумитаи кор бо ҷавонон ва варзишро супориданд.

Ҳамзамон дар ҳамин рӯз миёни сокинон ва ҷавонони ноҳияи Ванҷ аксияи тарғиботӣ - ташвиқотӣ таҳти унвони “Ҷавонон пайрави – Пешвои миллат” гузаронида шуд, ки дар рафти он беш аз 800 адад маводҳои иттилоотӣ ба сокинон тақсим карда шуданд. Дар маркази ноҳия ҷавонон бо шиору овезаҳои “Пешвои миллат – кафили хушбахтии мо ҷавонон ва варзишгарон”, “Пешвои миллат рамзи иттиҳод ва сарҷамъӣ” ва “Мо шуморо дӯст медорем - Пешвои миллат” роҳпаймоӣ доир карда шуд, ки ба ин васила ҷавонон садоқати худро ба ватан – модар ва Пешвои миллат баён намуданд.

Дар ноҳияи Рӯшон истиқболи иштирокчиёни форум дар назди даромадгоҳи ноҳия сурат гирифта, мардуми сарбаланду меҳнатқарини ноҳия бо гулу гулдаста ва савту навои дилнишин корвони ҷавононро дар сатҳи баланд пешвоз гирифтанд.

Зимни суҳбатҳо таъкид гардид, ки яке аз мақсадҳои сафар ба ин вилояти дурдасти кишвар муттаҳидӣ ва дӯстӣ байни ҷавонон мебошад. Ҷавонон дар суҳбату вохӯрӣ муҳтавои суханронии Сарвари давлатро, ки моҳи майи соли равон дар мулоқот бо аҳли ҷамоатчигии мамлакат оид ба масъалаҳои муҳими замони муосир баён доштанд, ёдовар шуда, инчунин иштирокчиён аз мавзеъҳои таърихиву мадании шаҳру ноҳияҳои Хоруғ, Ванҷ ва Шуғнон дидан намуданд.

Субҳи 18 июл, пеш аз оғози форум ба хотири арҷгузорӣ дар назди муҷассамаи аввалин поягузори давлати тоҷикон - Исмоили Сомонӣ гулчамбар гузошта, дар назди пояи Парчами давлатӣ ва дар шаҳри Хоруғ ҳамоиши “Ҷавонон – пайрави Пешвои миллат” баргузор гардид ва меҳмонон аз намоиши дастовардҳо ва ҳунарҳои мардумии ҳунармандони ВМКБ бахшида ба Соли рушди сайёҳӣ ва ҳунарҳои мардумӣ баҳравар гардиданд.

Баъдан дар толори мақомоти иҷроияи ҳокимияти давлатии вилояти ВМКБ Форуми ҷумҳуриявӣ бо иштироки ҷавонони фаъол таҳти унвони “Зиракии сиёсии ҷавонон – омили рушду суботи кишвар” доир гардид.

Дар форум Гулдаста Орумбекзода, муовини раиси ВМКБ, Ризо Назарзода, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Арамбегим Маҳтобшозода, раиси шаҳри Хоруғ ва Зебо Ҷумахонзода, муовини сардори хадамоти пешгирии ҳуқуқвайронкунӣ байни ноболиғон ва ҷавонони Вазорати корҳои дохилӣ суханронӣ намуданд.

Зимни баромад таъкид гардид, ки ҷавонони саодатманди тоҷик бояд ба ҳар гуна ҳаракатҳои ифротгароёна шомил нашуда, терроризмро маҳкум намоянд ва барои ободӣ ва шукуфоии Ватани азизамон саҳмгузор бошанд. Баргузории чунин ҳамоишҳо метавонад, баҳри таҳкими дустии байни ҷавонони шаҳру ноҳияҳо, ошноӣ пайдо намудан бо ҷойҳои таърихӣ ва баланд бардоштани ҳисси ватандустии ҷавонон нақши бисёр арзишманд гузошта бошад.

Хулоса форуми ҷумҳуриявии ҷавонон таҳти унвони “Зиракии сиёсии ҷавонон - омили рушду суботи кишвар” ва сайру саёҳат ба шаҳрҳои таърихиву қадимаи вилоят дар Соли рушди сайёҳӣ ва ҳунарҳои мардумӣ чорабинии хотирмон ва кори ниҳоят муҳим буда ба боло рафтани худшиносӣ, ҳисси миллии ҷавонон таъсири назаррас гузошт.

Дар навбати худ зиёда аз 100 нафар ҷавонони касбу кори гуногун, ки аз гирандагони стипендияи Президентӣ, стипендияи раиси шаҳри Душанбе, олимон ва муҳаққиқони ҷавон, варзишгарону кормандони соҳаи кор бо ҷавонон, санъаткорону адибон ва ихтиёриёни фаъоли мамлакат иборат буданд, иброз доштанд: “Мо зери сиёсати сулҳпарваронаи Сарвари давлатамон муҳтарам Эмомалӣ Раҳмон ҳамаи амалҳои номатлуби замони муосирро маҳкум менамоем ва зиракии сиёсиро аз даст надода, барои пойдории истиқлолияти мамлакатамон саъй менамоем”.

Ҳасан Ваҳҳобов, яке аз иштирокчиёни форуми мазкур бениҳоят хушҳол аст, ки дар фазои сулҳу суботи ватан бо дигар ҷавонон ба ВМКБ сафар намудаву аз урфу одат ва анъанаҳои қадимаи ин минтақа аз наздик шинос шудааст. Ӯ гуфт: “Барои ман фаромӯшношуданист, ки имрӯз дар ин минтақаи дурдасти кишвар назди яке аз қуллаҳои баландтарини дунё, қуллаи Исмоили Сомонӣ қарор дорам. Ин ҷо мо бо ҷавонони бадахшонӣ шиносоӣ пайдо намуда, дӯст гардидем. Бо боварӣ метавон гуфт, ки баргузории чунин форуму ҳамоишҳо омили таҳким ёфтани дӯстӣ миёни ҷавони кишвар хоҳад гашт.”

Хулоса ҳамаи он сад нафаре, ки дар доираи форум ба ВМКБ сафар намуданд, аз ин сафари хеш қаноатманд буданду шукргузорӣ менамуданд, ки дар фазои ободу осудаи ватан аз ҳар гӯшаи кишвар дидан менамоянду бо фарҳангу анъанаҳои ниёгон ошно мешаванд. Кулли иштирокчиёни форум сидқан ва самимона изҳор доштанд, ки аз тамоми имкониятҳои фароҳамовардаи Пешвои муаззами миллат ҷиҳати илму донишомӯзӣ самаранок истифода мебаранду бо аз худ кардани касбу ҳунарҳои гуногун ва забонҳои хориҷӣ саҳми арзандаи хешро дар рушду нумуъ ва ободии кишвари азизамон, ки ном онро Тоҷикистон аст, мегузоранд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Август 2018 c.