Соати 17:00 5 октябри соли 2016 дар Филармонияи давлатии Тоҷикистон ба номи А. Ҷӯраев маҳфили шеъру суруди таҳти унвони “Дурахши меҳр”, ба гиромидошти солрӯзи шоир Махсум Олимӣ баргузор мегардад.

Дар маҳфил Ҳунарпешаи мардумии кишвар Хосияти Зарафшонӣ, шоирону рӯзноманигорон, ҳаводорони шоир ва дигарон ширкат хоҳанд кард.

Махсум Олимӣ 10-уми октябри соли 1956 дар деҳаи Каздони ноҳияи Айнӣ чашм ба олами ҳастӣ кушодааст. Ба шеъргӯӣ соли 1973 сар кардааст. Нахустин шеъри ӯ бо номи «Модар» дар рӯзномаи ноҳиявии «Меҳнат»-и ноҳияи Айнӣ соли 1975 рӯи чоп омадааст.

Ҳамчунин, дар давраи донишҷӯияш дар шаҳри Қӯрғонтеппа шеъру таронаҳояш дар саҳифаҳои рӯзномаи «Ҳақиқати Қӯрғонтеппа», «Ҷавонони Тоҷикистон» ва «Маориф ва маданият» пайваста чоп мешуданд. Китоби нахустини шоир бо номи «Бӯи умед» соли 1985 дар нашриёти «Ирфон» ба нашр расидааст.

Бештари ашъори Махсум Олимӣ ба забони русӣ ва қисме аз шеърҳои ӯ ба забонҳои украинӣ, озарӣ, ӯзбекӣ, чувашӣ, болқарӣ, лагзӣ ва ғайра тарҷума шудаанд.

Хуршед МАВЛОНОВ, "ҶТ"