МУАЛЛИФ: ХУРШЕД ХОВАРӢ

Дар бадахлоқ тарбия ёфтани наврасон ва ҷавонон аз ҳама бештар кормандони соҳаҳои қудратӣ айбдоранд. Барои хушахлоқ тарбия ёфтани наврасон бояд тамоми сохторҳои ҷомеа кор баранд, ин танҳо вазифаи волидон нест.

Ин нуктаро Рамазон Раҳимзода, вазири корҳои дохилӣ дар нишасти матбуотӣ баён кард.

Вазир қайд намуд, ки соли 2016 дар ҷумҳурӣ 21 ҳазору 756 ҷиноят ба қайд гирифта шудааст, ки 693-тои онро ноболиғон содир намудаанд. Ба таъкиди номбурда, гарчанде ин рақам нисбат ба соли 2015 49 ҳолат кам аст, аммо то ҳол нигаронкунанда боқӣ мемонад.

Дар натиҷаи корҳои фаҳмондадиҳӣ аз ҷониби командони ВКД сафи шомил шудани ҷавонон ба ҳизбу ҳаракатҳои ифротиву террористӣ коҳиш ёфтааст. “Ба ҳизбу ҳаракатҳои ифротӣ, асосан нафароне шомил мешаванд, ки саводи кофӣ ва ҷойи кор надоранд ё мавқеи худро дар ҷомеа пайдо карда наметавонанд”, - иброз дошт вазир.