Дар натиҷаи таркиши маргталабе дар шимолу ғарби Покистон се нафар, аз ҷумла ду корманди пулис ҷони худро аз даст доданд.

Дар ин ҳамла, ки ҳадафи он зоҳиран тарконидани бинои ҳукумати маҳаллӣ буд, чаҳор тани дигар низ ҷароҳат бардоштаанд.

Мақомоти маҳалӣ мегӯянд, 15 феврал ду маргталаб талош карданд, ки ба бинои ҳукумати маҳаллӣ дар ноҳияи қабиланишини Моҳманд ворид шаванд. Вале вақте онҳоро дар назди даромадгоҳ боздоштанд, якеашон худро тарконида, дуюмӣ дар натиҷаи задухурд бо нерӯҳои амниятӣ ҷон додааст.

Ибтидои ҳафтаи равон низ дар натиҷаи таркиши як маргталаб дар Лоҳур, шарқи Покистон, 13 кас ҷон дода, масъулияти онро гурӯҳи "Ҷамоат ал-Аҳрор", як шохаи ҳаракати Толибон ба зимма гирифт. Ин гурӯҳ дар ноҳияи Моҳманд, яке аз минтақаҳои ноороми Покистон дар марз бо Афғонистон фаъол аст, ки паногоҳи ҷангиёни хориҷию дохилии марбут ба ал-Қоида низ шумурда мешавад.