Аз 22 апрел то 20 май бо ташаббуси Бахши ҷавонон, варзиш ва сайёҳӣ ва мақомоти иҷроияи ҳокимияти давлатии ноҳияи Бохтар дар  марказҳои ҷамоатҳо зери унвони «Корвони ҷавонон» чорабинии иттилоотӣ-фарҳангӣ баргузор мегардад.

- Мақсад аз ташкили «Корвони ҷавонон» дар арафаи таҷлили ҷашни 20-солагии Рӯзи Ваҳдати миллӣ ва "Соли ҷавонон" бо мақсади боло бардоштани ҳисси ватандӯстӣ ҷавонони ҷамоатҳои шаҳраку деҳоти ноҳия ва аз наздик расонидани дастовардҳои даврони соҳибистиқлолии мамлакат мебошад, - гуфт мудири Бахши ҷавонон, варзиш ва сайёҳии ноҳияи Бохтар Парвиз Азимов.

Ба гуфтаи манбаъ дар доираи «Корвони ҷавонон»  гурӯҳои корӣ дар ҷамоати шаҳрак ва деҳоти ноҳия вохӯрию чорабиниҳои оммавии иттилоотӣ –фарҳангӣ мегузаронанд.

Гуфта шуд, ки ҳайати гурӯҳи кории «Корвони ҷавонон» аз ҳисоби кормандони  ташкилоту муассисаҳо ва ҷавонони фаъоли ноҳия, аз ҷумла бахшҳои ҷавонон, варзиш ва сайёҳӣ, сабти асноди ҳолати шаҳрвандӣ, оид ба корҳои дин, танзими анъана ва ҷашну маросимҳои миллӣ,  шуъбаҳои маориф, фарҳанг, тандурустӣ, кор бо занон ва оила таъсис дода шудааст.

Умед Мирзоев, "ҶТ"