Ҳар гоҳ аланга гирифтани танишҳои мусаллаҳона миёни мардуми Фаластин ва ҳарбиёни яҳуд касеро ба ҳайрат намеандозад. Гӯё ба ин одат кардаанд. Лек ин бор мушакпарониҳои ду тараф аз боиси нақшаҳои ҳуқуматдорони Исроил бо сарварии Бинёмин Нетаняҳу, ки мардуми таҳҷои Фаластин, сокинони қисмати шарқии Байтулмуқаддасро аз манзилҳои худ мехост зӯран берун созад, кор ранги дигар гирифт. Илова бар он, манъи мардуми араби сокинони ин минтақа дар интихоботи давлати Фаластин боиси хашму ғазаби эшон гардид. Вазъ аз он хотир боз ҳам муташанниҷ гардид, ки дар даҳаи охири моҳи рамазон, ҳангоми адои намози ҷумъа, ҳарбиёни яҳуд ба масҷиди Ал-Ақсо ворид шуда, ба адои намоз, ки беш аз 75 ҳазор мардуми мусулмон гирд омада буданд, хостанд тафтиш гузаронанд. Ин амал ба задухӯрд оварда расонд ва афроди зиёд захм бардоштанд. Кирдорҳои ноҷо ва нангини яҳудиён дар моҳи рамазон, моҳи муқаддас барои мусулмонон ҷараён гирифт.

Гурӯҳи муборизи Ҳамос эълон дошт, ки ба шаҳри Тали Абиб (Тел-Авив), пойтахти давлати яҳудиён садҳо мушак сар додааст. Мувофиқи маълумоти васоити ахбори оммаи маҳаллӣ, ин ҳамлаи шадидтарин муддати даҳсолаҳои охир маҳсуб меёбад, ҳукуматдорони Исроил маҷбуран аз бастани фурудгоҳи байналмилалии Бен-Гурон дарак доданд. Дар посух исроилиҳо ҳамлаҳои ҳавоиро тавассути тайёраҳо роҳандозӣ намуда, минтақаи Ғозаҳ мавриди бомбаборони шадид қарор гирифт. Садҳо нафар мардуми осоишта ба ҳалокат расида, афроди аз ин ҳам зиёд маҷруҳ гаштанд. Иншооти гуногун, манзилҳои истиқоматӣ ва ҳатто маркази матбуотии хабарнигорони хориҷӣ дар ин минтақа ба хок яксон шуд.

Зимни суҳбат ба хабаргузории “Росбалт” коршиноси рус доир ба Шарқи наздик Михаил Магид чунин изҳор намудааст: “Исроил ҳудудҳои Фаластинро ба зиндон дар ҳавои кушод табдил додааст. Вазъи мардуми Фаластин беҳуқуқӣ ва бенавоист. Исроил имкон намедиҳад фаластиниҳо давлати мустақили худро ташкил диҳанд ва дар минтақаҳои зисти худ озодона ҳаракат намоянд. Дар ҳама ҷо дидбонгоҳҳои ҳарбиёни исроилӣ мавҷуд буда, аз як маҳалли зист ба дигар маҳал ҳаракат намудан, аз боиси тафтишҳои сахт, соатҳо тӯл мекашад. Дар қисмати шарқии Байтулмуқаддас ва қисмати ғарбии соҳили рӯди Урдун дар натиҷаи ғасби замини фаластиниён беш аз 700 ҳазор иқоматгоҳ барои мардуми яҳуд бунёд шудааст. Албатта, дар чунин вазъи тоқатфарсо мардуми Фаластин эътироз баён дошта ва ба мубориза мехезад”.

Кирдори ғайриинсонии ҳукуматдорони Исроилро нисбати мардуми Фаластин, намояндаи махсуси СММ доир ба умури Шарқи наздик Ричард Фалк, “системаи мустамликадорӣ ва беҳуқуқӣ” номидааст.

Амалкардаҳои яҳудиён боиси хашму ғазаби мардум ва роҳбарияти як қатор кишварҳои минтақа, аз ҷумла Эрон ва Туркия гардид. Туркия ният дорад, киштиҳои ҳарбии худро ба соҳилҳои Исроил фиристад. Эрон бошад, изҳор доштааст, ки муддати ду соат ба Исроил то 20 ҳазор мушак партоб карда метавонад. Ин ҳолат тарси ҳарбиёни яҳудро ба бор овардааст. Ва онҳо иқрор шудаанд, ки ягон системаи мудофиаи ҳавоӣ дар олам қодир нест, ин шуморро пешгирӣ намояд.

Ҳамчунин, зикр бояд кард, ки барои маъмурияти кунунии ИМА таҳти сарварии Ҷо Байден, хилофи Доналд Трамп, кирдорҳои ношоями исроилиҳо нописанд аст. Дар ҳолати дастгирӣ наёфтан аз ҷониби такягоҳи асосӣ дар симои ИМА ҳоли яҳудиён табоҳ хоҳад шуд.

Т. ДАВЛАТ, ”ҶТ”