Кирдори мудҳишу ғамнок, ғамбору пурпеч ва фоҷиаангези ҷавонони тоҷик нигаронкунанда мебошад. Дар дохили созмонҳои иртиҷоии исломӣ фарқ байни инсону ҳайвон сутуда шудааст. Кас намедонад ба киву чи бовар кунад. Ба чунин воқеаҳо нигаристан ва дар бораи он чизе гуфтан хеле гарон аст. Дар баробари ин, ҳадди аксар ва ҳадди имконпазир инсон ба рафтори инсони ҳайвонсифат бетарф буда наметавонад. Бадбахтиҳои зиёдеро гурӯҳу қувваҳои ифротгарову террорист ба сари мардум меоваранд, махсусан, ба сари ҷавонон. Онҳоро бо роҳҳои гуногун мефиребанд. Вақтҳои охир аъзои «Давлати исломӣ» ба фиреби ҷавонон дар зиндонҳои хориҷи кишвар пардохтаанд.

Чеҳраи ифротгарою террористи машғули хариду фурӯши ғайриқонунии маводи мухаддир, ки ба ҳайси муҳоҷири меҳнатӣ кор мекард ва кунҷи зиндонро макони ҳамешагии худ қарор дод, кам нест. Ҳарчанд ҳар рӯз қочоқчиии маводи мухаддире боздошт шуда ба зиндон меравад, ба ҷои он ки ислоҳ шуда, аз аъмоли ғайриқонунии худ даст ка¬шад, баръакс, бо рафтори тундгароӣ ва ҷалби ҷавонон ба гурӯҳҳои тер¬рористиву экстремистӣ рӯз то рӯз шумораи онҳо меафзояд. Ҳоло бошад баъзе қочоқчиёни маводи мухаддир, ки боздошт шуда буданд, ба кори разилтаре даст мезананд. Гӯё барои равон намудани мардону занону ҷавонон ба сафҳои «Давлати исломӣ» «камари ҳиммат» бастаанд. Акнун аз хариду фурӯши ғайриқонунии маводи мухаддир боз ба ифротгарову террорист табдил ёфтаанд.

Ҳамин аст, ки Суди Нижний Тагили Русия баррасии парвандаи як шаҳрванди Тоҷикистонро бо айби даъвати ошкоро барои пайвастан ба сафи «Давлати исломӣ» шуруъ кард. Ҳарчанд аз ин шаҳрванди Тоҷикистон ном бурда намешавад, вале дафтари матбуотии Суди Ниж¬ний Тагил гуфтааст, ки ӯ ҳангоми адои ҷазо дар зиндони рақами 5-и ин шаҳр маҳбусонро барои пайвастан ба гурӯҳи террористӣ ва экстре¬мистии «Давлати исломӣ» даъват кардааст. Қарор буд, ин шаҳрванди Тоҷикистон, ки барои қочоқи маводи мухаддир зиндонӣ шудааст, пас аз 6 моҳ аз маҳбас озод шавад. Ҳамакнун дар сурати собит шудани айб мумкин аст ин шахс ба муддати 4 соли дигар равонаи зиндони низомаш сахт маҳкум шавад.

Бояд ёдовар шуд, ки аксари чунин ҷавонон ба дасти нимчамуллоҳову таблиғотгарони ифротӣ афтода, ба роҳи бад мераванд. Фаҳми нодурусти дингароиҳост, ки бо ду-се гумроҳ ба ифротгароӣ мепайванданд. Ҷойи нигаронии ҷиддист, ки ба ҷустуҷӯи ризқу рӯзӣ рафта, лекин ба корҳои баде, ки нафрати дигаронро меоварад, ҳамроҳ мегарданд.

Ин дар ҳолест ки соле қабл мақомоти Русия панҷ муҳоҷири тоҷикро бо рафтори ифротгароӣ дар Санкт Петербург боздошт карда ба Тоҷикистон фиристонида буданд. Дар кирдорҳои муҳоҷирини тоҷик даъватҳои оммавӣ ба хотири ташвиқи терроризм, кӯшиши сафед намудани терро¬ризм, даъват ба душманӣ ва таҳқири шаъни инсон ба мушоҳида мера¬сид. Бояд ҳарчи зудтар бадкирдорҳоро боздошт намуда, ҳам давлат ва ҳам ҷоеаро аз ифротгарою террорист тоза намуд. Чунки онҳо тавассути тақаллубкориву чоплусӣ ва ифротгароӣ маблағ ба даст меоранд ва ин тақаллубкорону чоплусон дер ё зуд боздошт мешаванд.

Рустам РАҲИМОВ