Дар шаҳри Верони Италия 28 октябр, Форуми XIV –уми иқтисодии Авруосиё оғоз гардид.

Форум зери унвони “Авруосиё дар роҳи рушди геополитикӣ ва иҷтимоию иқтисодӣ” доир гардида, дар он масъалаҳои иқтисодиёт, молия, тандурустӣ, муҳити зист ва инноватсияи технологӣ дар фазои Авруосиёи бузург аз Атлантика то уқёнуси Ором мавриди баррасӣ қарор хоҳанд гирифт.

Дар форум сиёсатмадорони Русия ва Аврупо, ҳамчунин роҳбарони ширкатҳои истеҳсолии як қатор кишварҳои аврупоӣ ширкат менамоянд. Форум ду рӯз, 28-29 октябр идома ёфта, рӯзи аввал аз рӯи масъалаҳои бехатарии манбаъҳои энергетикӣ, иқтисодиёти сабз, муносибатҳои байналмилалӣ ва таҷрибаҳои экологӣ музокирот сурат мегирад.

Рӯзи дуюм масоили оқибатҳои пандемия барои соҳаи молия ва бонкҳо, инноватсия ва гузариш ба иқтисоди рақамӣ, нақши саноати дорусозӣ, аз ҷумла ваксинаҳо дар пешгирии бемории коронавирус мавриди муҳокима қарор хоҳанд гирифт.

Тибқи иттилои хабаргузории “РИА Новости” дар чорабинӣ 800 нафар, аз ҷумла 70 нафар журналист ширкат мекунанд.