Президенти Ҷумҳурии Тоҷикистон муҳтарам Эмомалӣ Раҳмон бо Директори идории Хазинаи байналмилалии асъор (ХБА) хонум Кристалина Георгиева мулоқот намуда, масъалаҳои иқтисодиро баррасӣ намуданд.

Дар ин бора Маркази матбуоти Президенти кишвар иттилоъ дода, зикр менамояд, ки 16 май дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон хонум Кристалина Георгиеваро ба ҳузур пазируфтанд.

Дар рафти мулоқот масоили ҳамкории Тоҷикистону Хазинаи байналмилалии асъор баррасӣ гардид.

- Ҷонибҳо оид ба ҳамкорӣ дар самтҳои пешбурди ислоҳоти иқтисодӣ, нигоҳдории суботи макроиқтисодӣ, дастгирии тавозуни пардохт, таъмини устувории захираҳои байналмилалӣ ва баланд бардоштани сатҳи зиндагии мардум табодули андеша карданд,-омадааст дар хабар.

Инчунин гуфта мешавад, ки роҳҳои тобовар намудани иқтисоди Тоҷикистон ба таъсири манфии омилҳои беруна, аз ҷумла шиддати хавфҳои геосиёсӣ, нооромиҳои минтақавӣ ва пайомадҳои тағйирёбии иқлим аз мавзӯҳои муҳими суҳбат арзёбӣ гардид.

Барои устувории рушди иҷтимоиву иқтисодӣ ва беҳбуди фазои сармоягузорӣ дар кишвари мо идомаи ислоҳоти иқтисодӣ ва ҷудо намудани маблағҳои грантӣ зарур шумурда шуд.

Ҳамзамон гуфта мешавад, ки тарафҳо оид ба густариши ҳамкорӣ бо шарикони рушд дар соҳаҳои судовари саноат, кишоварзӣ, энергетика ва тақвияти неруи инсонӣ андешаронӣ намуданд.

Фарзонаи УМАРАЛӢ, “ҶТ”