Дар шаҳри Лос-Анҷелес 89-умин маросими супоридани ҷоизаи Академияи синамои Амрико - "Оскар" баргузор шуд. "Рӯшноии маҳтоб"-и Барри Ҷенкин филми сол эълон гашта, ҳамчунин дар бахшҳои "Беҳтарин ҳунарманди дараҷаи ду" ва "Беҳтарин филмнома" ҷоиза ба даст овард.

"Ла-Ла-Лэнд", ки бо иштибоҳи муҷрии маросим дар аввал филми сол эълон гашт, соҳиби шаш пайкараи тиллоӣ шуда, муаллифи он Дэмен Шазелл ҷоизаи "Оскар"-ро дар бахши беҳтарин коргардон соҳиб гашт. Ӯ ҷавонтарин нафаре шуд, ки дар ин бахш соҳиби ҷоиза мешавад.

Ҷоизаи бахши "Беҳтарин нақши зан" насиби Эмма Стоун шуд, ки дар "Ла-Ла-Лэнд" нақш офаридааст. "Оскар"-ро барои беҳтарин филмномаи аслӣ драмаи Кеннет Лонерган "Манчестер дар лаби баҳр" ба даст оварда, ба иҷрокунандаи нақши асосии он Кейси Аффлек ҷоизаи "Беҳтарин бозигари нақши мард" дода шуд.

"Беҳтарин филми кутоҳи анниматсинонӣ" "Зверополис" ва "Беҳтарин филми мустанад" "О. Ҷей. истеҳсоли Амрико" эълон гаштанд.

Филми "Фурӯшанда"-и коргардони эронӣ Асғар Фарҳодӣ, ки ба ин маросим наомад, барандаи ҷоизаи "Беҳтарин филми ғайрианглисизабон дар ҷашнвораи "Оскар" шуд.

Ҷоизаро дар бахши филми ҳуҷҷатии кутоҳ "Кулоҳхуди сафед" дар бораи яке аз созмонҳои ихтиёрӣ дар Сурия соҳиб шуд. Муаллифони он Орландо фон Айнсидел ва Ҷоэнна Натасегара ҳини суханрониҳояшон дар маросим хостанд, ки ҳарчи зудтар ба даргириҳои Сурия хотима дода шавад.