1-уми май дар кишвар нахустин мусобиқаи байналмилалӣ оид ба парапланеризм барои дарёфти Ҷоми Пешвои миллат баргузор мегардад.

Дар ин бора сомонаи расмии Варзиш тв хабар дод.

Мусобиқаи мазкур дар доманакӯҳҳои ноҳияи Данғараи вилояти Хатлон бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Федератсияи парапланеризм ва воситаҳои сабуки парвозии Тоҷикистон дар якҷоягӣ бо Мақомоти иҷроияи ҳокимияти давлатии вилояти Хатлон ва бо дастгирии Мақомоти иҷроияи ҳокимияти давлатии шаҳри Душанбе, инчунин Корхонаи воҳиди давлатии хизматрасонии корпуси дипломатии “Дипсервис” доир карда мешавад.

Чуноне дар хабари мазкур зикр гардидааст дар ин мусобиқаи байналмилалӣ зиёда аз 100 варзишгар аз давлатҳои қитъаи Аврупо, мамлакатҳои Амрико, Арманистон, Аморати Муттаҳидаи Араб, Беларус, Русия, Ҳиндустон, Қазоқистон, Туркия, Ҷумҳурии Мардумии Чин, Ӯзбекистон ва Тоҷикистон иштирок карда, байни ҳам қувваозмоӣ мекунанд.

Парапланеризм як навъ мусобиқаи варзишие аст, ки дар он варзишгарон (чатрбозон) бо воситаи параплан ё парашутҳои махсус дар фазо ба муддатҳои тулонӣ парвоз мекунанд.