Санаи 23 май, дар Муассисаи давлатии Маҷмааи таърихӣ – фарҳангии “Истиқлол” маросими тантанавӣ бахшида ба Рӯзи ҷавонони Тоҷикистон доир гардид.

Абдураҳмон Қодирӣ, раиси вилояти Суғд, дар чорабинии идона нахуст аз намоишгоҳи ҳафт минтақаи Тоҷикистон – Хуҷанд, Зарафшон, Ҳисор, Вахш, Кӯлоб ва Бадахшон дидан намуда, зимни суханронии худ изҳор дошт: “Дар ин лаҳзаҳои пурсафо, ки мо яке аз ҷашнҳои фархунда ва пуршукӯҳи кишвар – Рӯзи ҷавонони Тоҷикистонро бо шукргузорӣ аз сулҳу субот ва ваҳдату якдилӣ таҷлил менамоем, ҳамаи шуморо самимона таҳният гуфта, бароятон саодати рӯзгор, комгориву тавфиқ, талошҳои муваффақона дар омӯзиши илму маърифат ва анҷоми корномаҳои бузург барои пешрафту шукуфоии Тоҷикистони азизамон таманно менамоям”.

Таъкид гардид, ки дар вилояти Суғд ҷавонон дар вазифаҳои гуногун кору фаъолият доранд. Имрӯзҳо 656 нафар ҷавонон, аз ҷумла 184 нафар ҷавондухтарон дар вазифаҳои гуногун ҳамчун хизматчии давлатӣ фаъолият менамоянд. Ба таҳсили ҷавонон дар муассисаҳои олӣ низ диққати махсус зоҳир гардида, дар муассисаҳои таҳсилоти олӣ ва миёнаи касбии вилоят 60640 нафар ҷавонон, аз ҷумла 33255 нафар духтарон бо аз худ намудани донишҳои муосир машғуланд. Шоистаи таъкид аст, ки шумораи донишҷӯёни дар хориҷи кишвар таҳсилкунанда наздик 4300 нафарро ташкил медиҳад, ки аз ин миқдор наздик 4 ҳазор нафар дар донишгоҳу донишкадаҳои кишварҳои Иттиҳоди Давлатҳои Мустақил ва 300 нафар дар хориҷаи дур таҳсил мекунанд.

Дар охир, Абдураҳмон Қодирӣ ба 130 нафар гирандагони Стипендияи Раиси вилояти Суғд, ғолибони озмунҳои вилоятии “Гулдухтарони суғдӣ” ва “Ҷавонон – рушди илм, завқеи бадеӣ ва худшиносии миллӣ” шаҳодатномаву стипендия ва мукофотпуливу тӯҳфаҳои хотиравӣ тақдим намуд.

Шералӣ АЗИМӢ, “ҶТ”