Дар шаҳри Душанбе 14-уми сентябр бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон вохӯрии аъзои Муколамаи занони Осиёи Марказӣ дар мавзӯи “Ноил гаштан ба баробарии гендерӣ дар заминаи мутобиқшавӣ ба тағйирёбии иқлим дар Осиёи Марказӣ” доир гардид.

Ин чорабинӣ дар доираи Вохӯрии панҷуми машваратии сарони давлатҳои Осиёи Марказӣ ва Шурои сарони давлатҳои муассиси Фонди байналмилалии наҷоти Арал баргузор гардид.

Дар вохӯрии мазкур намояндагони занони панҷ кишвар, аз ҷумла, Ҳилолбӣ Қурбонзода, раиси Кумитаи кор бо занон ва оилаи кишвар, Танзила Норбаева, раиси Маҷлиси Сенати Олии Узбекистон, раиси комиссияи ҷумҳуриявӣ оид ба масъалаҳои баланд бардоштани мақоми зан дар ҷомеа, баробарии гендерӣ ва оила, Еспаева Дания, муовини раиси маҷлими намояндагони Қазоқистон, Ҷамилаи Исаева, муовини раиси Торага Жогорку Кенешии Қирғизистон, Дурдиева Акҷемал, раиси Шурои иттифоқи занони Туркманистон, Имнадзе Каха, намояндаи махсуси Дабири кулли СММ ва Наталя Герман, директори иҷроияи Директорати иҷроияи Кумитаи зиддитеррористии Шурои амнияти СММ иштирок ва баромад намуданд.

Вохӯрӣ дар ду ҷаласаи панелӣ доир гардида, масъалаҳои "Ноил шудан ба баробарии гендерӣ дар заминаи мутобиқшавӣ ба тағйирёбии иқлим ва офатзои табиӣ дар Осиёи Марказӣ", "Ташаббусҳои экологии Осиёи Марказӣ дар татбиқи Ҳадафҳои рушди кстувор"-ро мавриди таҳлил ва муҳокима қарор дода, миёни меҳмонону иштирокдорон вобаста ба мавзӯъҳои зикргардида мубодилаи афкор сурат гирифт.

Инчунин доир ба масъалаҳои баррасишаванда ва вобаста ба андешидани чораҳои мушаххас дар самти ноил шудан ба баробарии гендерӣ дар заминаи мутобиқшавӣ ба тағйирёбии иқлим дар Осиёи Марказӣ аз ҷониби иштирокчиён тавсияҳои ҳамкорӣ дода шуда, ба унвонии сарони давлатҳо изҳороти аъзои Муколамаи занони ОМ қабул гардид.