ФАРҲАНГ
Шанбе 21 Сентябр 2019 08:43
1375
Дар зиндагӣ ҳеҷ кас намехоҳад, ки аз дигарон ақиб бошаду ба муваффақияти дигарон танҳо дида дӯзад. Зеро табиати инсон ҳамин аст, ки мекӯшад аз дигарон як қадам пеш бошад. Ин қувва дар вуҷуди ҳар шахс ба чашм мерасад ва то кадом андоза он дар ҳаёт амалӣ мешавад, ба худи шахс вобастагӣ дорад.

Сулҳия дар баробари дигарон доим талош менамуд, то дар ҷодаи писандидааш ба дастдовардҳои назаррас ноил гардад. Ҳамин буд, ки имрӯз сарбаландона фаъолият дорад.
Сулҳия Назарова соли 1985 дар шаҳри Кӯлоб ба дунё омадааст. Соли 2002 пас аз хатми мактаби миёна тибқи квотаи Президенти ҷумҳурӣ ба Донишгоҳи миллии Тоҷикистон, факултети журналистика дохил гардид. Ин муассисаи олиро соли 2007 сарбаландона хатм кард.

Замони таҳсил дар донишгоҳ барои хубтар аз худ намудани донишҳои соҳа ва ба ҳам пайвастани донишҳои назариявӣ бо амалӣ ҳамкориашро бо Шабакаи ТВ “Тоҷикистон” ба роҳ монд. Таҷрибаомӯзиҳояш низ дар муассисаи мазкур мегузашт ва ӯ маҳорату малакаи хешро нишон дода, аз соли 2006 ҳамчун корманд ба фаъолияти эҷодӣ шуруъ намуд.

– Вақте дар мактаби миёна мехондам, шавқу рағбат бештар ба фанҳои забон ва адабиёт доштам. Маҳз ҳамин шавқу ҳавас буд, ки маро ба сӯйи озмунҳо раҳнамун месохт. Дар озмуне бо номи “Ровиён” иштирок намуда, бо қироат намудани шеърҳо сазовори ҷойи аввал гардидам. Ин ҳама боис гардид, то роҳ пеш гирам сӯйи касбе, ки меҳри худро дар ботинам ҷо намуда буд, - мегӯяд Сулҳия Назарова.

Аз соли 2013 то соли 2016 дар Маркази тадқиқоти стратегии назди Президенти кишвар фаъолият намуда, айни ҳол дар Палатаи ҳисоб ба ҳайси мудири бахши иттилоотӣ фаъолият дорад.

Ба назари Сулҳия, ҳар нафар чун ба коре мехоҳад шуруъ намояд, пеш аз ҳама меҳри онро дар қалбаш ҷо менамояд. “Як чиз бароям аҷиб буд, ки ҳамеша дарк менамудам, ки танҳо журналист ҳақиқатро мегӯяду аз камбудиҳои ҷомеа ҳарф мезанад. Ин пеша дарди ҷомеаро баён намуда, онро то андозае сабук менамояд. Дар баробари ин, баъзе масъалаҳое ҳастанд, ки сирф ба як соҳа дахл дорад. Аммо журналистика метавонад, ба кулли соҳаҳое, ки дар ҷомеаи мо ҳаст, ба ҳамаи онҳо даст занад. Намояндагони ин соҳа масъалаи мавриди таваҷҷуҳашонро меомӯзанд, ҳаматарафа баррасӣ менамоянд ва дар баробари ин ба дигарон маълумот медиҳанд. Журналистика аз ҳамин хотир барои ман аҷиб буд”, - мегӯяд ӯ.

Ҳеҷ гоҳ аз пешаи интихобнамудааш пушаймон нагардидааст. Чунки танҳо умедаш ҳамин буд, ки омӯзад, фардо соҳибкасб гардад ва дар ҷомеа мавқеъ пайдо намояд. Ҳамеша ба он ҷаҳд менамояд, ки дар пешрафту шукуфоии Меҳан ҳамчун як фарди ҷомеа саҳми арзанда гузорад.

- Тамоми касбҳо нозукиҳои хос доранд. Ҳар пеша аз шахс малака ва дониш талаб мекунад. Нафаре, ки илм ва дониш надошта бошад, ҳаргиз рӯзноманигори хуб шуда наметавонад. Барои чизеро тавассути қалам тасвир намудану баррасӣ кардан, аввалан дарку фаҳм лозим. Агар дар ин роҳ фаҳмиши хуб набошад, ба чизе ноил шудан ғайриимкон аст. Бинобар ин, агар ҳар нафаре ки касби худро дӯст медорад, пеш аз ҳама бояд аз донишҳои замонавӣ бархурдор бошад, - дар идомаи суҳбат иброз дошт Сулҳия.

Чун як фарди соҳибмаълумот вазъи имрӯзаи ҷомеаро хуб арзёбӣ менамояд. Чунки имрӯз тамоми соҳаҳо рӯ ба рушд мебошанд. Имрӯз баҳри ҷавонон шароите фароҳам омадааст, ки ҳатто онҳо метавонанд, таҳсили худро дар хориҷи кишвар ба роҳ монанд. Ҷомеа имрӯз ба пеш ҳаракат карда истодааст ва ҳар яки мо низ бояд ҳамнабзи ҷомеа бошем. Агар мо як рӯз фаъолият накунем, аз ҷомеаи ҷаҳонӣ қафо хоҳем монд.

– Ҳар кас дар зиндагӣ бояд дорои касб бошад. Зеро доштани ҳунар ба инсон доим кӯмак мерасонад. Бахусус дар шароити имрӯза бе доштани ягон касб наметавон умр ба сар бурд. Ҳар нафаре дар зиндагӣ мехоҳад, ки соҳиби обру ва мавқеъ бошад, пас бояд дар роҳи андӯхтани пешае азм намояд. Ҳар шахс мехоҳад, ки доим муваффақ ва комёбиҳо пайваста ҳамроҳаш бошад. Барои расидан ба ҳадафҳои накӯ касе ба мо кӯмак намекунад. Дар ин роҳ инсон бояд танҳо худаш кӯшишу талош намояд. Вақте бо итминони комил ба коре андармон мешавад, пас бо боварӣ метавон гуфт, ки оқибати он низ боровар хоҳад шуд, - афзуд ҳамсуҳбати мо.

Бо иродаи устувор ба сӯйи фатҳи қуллаи мақсуд раҳсипор аст. Айни ҳол дар баробари фаъолият дар бахши иттилоотии Палатаи ҳисоб унвонҷӯи Маркази тадқиқоти стратегӣ мебошад. Мо барои комёб гардиданаш ҳам дар роҳи фаъолияти касбӣ ва ҳам дар роҳи илм ба ин бонуи зебо барору комёбӣ хоҳонем.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

Сентябр 2019 c.