Имрӯз, 7 октябр, дар доираи Намоишгоҳи шашуми байналмилалии “Китоби Душанбе” дар мавзӯи “Рушди соҳаи табъу нашр дар 25 соли Истиқлолияти давлатии Ҷумҳурии Тоҷикистон” конференсияи илмӣ-амалӣ баргузор гардид.

Нурмуҳаммади Амиршоҳӣ, директори Саридораи илмии “Энсиклопедияи миллии тоҷик” конференсияро ифтитоҳ бахшида, таъкид сохт, дар 25 соли ахир он чизе ки дар ҷумҳурӣ дар соҳаи табъу нашр ба даст омадааст, агар ба солҳои аввали истиқлол муқоиса кунем, аз замин то осмон тафовут дорад.

Сироҷиддин Икромӣ, директори КВД “Таъминот ва савдои “Китоб”, дар мавзӯи “Китоб ва харидор: ҳолат ва дурнамои таъминот ва фурӯши китоб” маърӯза намуда, гуфт, ки коҳишёбии савдои китоб дар кишвар маҷмуан барои касе пӯшида нест. Баъзе аз коршиносони соҳа дар мавриди ин масъала бар ин ақидаанд, ки нархи китобҳо гарон буда, ба кисаи мардум мувофиқ нест. Шояд то як андоза чунин ҳам бошад. Сабаби то ҷое гарон гардидани нархи китобҳо бо теъдоди ниҳоят кам ба нашр расидани онҳост. Маълум аст, ки дар чопи китоб адади нашр ҳар қадар зиёд шавад, нархаш ҳам ҳамон қадар арзон мешавад.

– Мутаассифона,  дар кишвари мо китобҳо аз 200 то 1000-1500 нусха ба нашр мерасанд, ки барои 8 миллион аҳолӣ кам аст. Таҳлилҳо нишон дод, ки нархи китоб сабаби рӯгардонии ниёзмандон аз китоб нест. Чаро ки ҳар хона камаш ду-се телефони мобилӣ дорад. Ба маврид медонам бигӯям, ки пас аз 50-100 сол мардум ба китобу китобхонӣ ҳатман рӯ меоранд. Ба ин чиз эътимод дорам. Зеро мардуми мо аз қадим бофарҳангу тамаддундору тамаддунофар буд. Аз ин рӯ, аз сардии бозори китоб ноширони мо бояд рӯҳафтода нашаванд, балки барои нашри китобҳои хуб бо дилгармӣ кору фаъолият намоянд, - гуфт Сироҷиддин Икромӣ.

Иштирокчиёни дигар низ дар мавзӯъҳои гуногуни вобаста ба соҳа маърӯза намуда, баҳри боз ҳам рушд бахшидани ин соҳаи муҳим, ки омили рушди ҷаҳони маънавист, табодули афкор карданд.

Беҳрӯз ХОЛМУРОДОВ
Хуршед МАВЛОНОВ, “ҶТ”