Чоршанбе Аловатов ҳунарманди ҷавон, писари сарояндаи маъруф Ақназар Аловатов мебошад. Ӯ дар синни 22 - солагӣ бо истеъдоди хуб, овози форам ва маҳини худ ҷаҳониёнро шигифтзада кард. Аловатов дар озмуни “Истеъдодҳои Осиёи Миёна” (Central Asia’s Got Talent) дар Қазоқистон пирӯз гардида, соҳиби шоҳҷоиза гардид. Бахшида ба 30 - солагии Истиқлолияти давлатии Ҷумҳурии Тоҷикистон бо ин ҷавони ҳунарманд суҳбате доштем, ки фишурдааш манзури хонанда мегардад.

- Чоршанбе аз чандсолагӣ ба олами санъат майл намуд ва барои чӣ?

- Ман, ки дар оилаи санъаткор бо воя расидам, аз кӯдакиам ба санъат шавқи беандоза доштам. Ҳангоме падарам суруд мехонд, ман хеле шодӣ мекардам. Кӯшиш менамудам, ки ҳамроҳ бо падарам суруд хонам. Нозукиҳои санъатро аз ӯ ёд гирифтам. Аз ҳамон айём муҳаббати санъат ва сурудхонӣ дар дилам ҷо шуд.

- Дар роҳи санъат ба шумо бештар киҳо кумак мерасонанд?

- Чун дар боло зикр кардам, истеъдоди падарам маро ба санъат наздиктар намуд ва пайваста кӯшиш мекардам, ки дар ҷодаи интихобкардаам муваффақ шавам. Дар барномаву озмунҳое, ки дар дохили кишвар байни нав-расон баргузор мешуд, иштирок ва баромад мекардам. Нахустин бор соли 2011 дар озмуни "Овози тиллоӣ", дар жанри фалак ширкат карда, соҳиби мақоми аввал шудам. Соли 2014 дар озмуни "Шукуфаҳои пойтахт" низ суруде дар жанри фалак иҷро кардам ва мақоми аввалро аз худ намудам. Соли 2017 дар озмуни "Парвин" ҳунарнамоӣ карда, боз соҳиби ҷоизаи асосии озмуни овозхонӣ гардидам. Ростӣ, саҳми падарам дар ин роҳ калон аст, чун ӯ ҳамеша ҳамроҳам буд ва маро ба олами санъат ворид намуд, то номбардори миллати тоҷик шавам.

- Ҳар ҷода нахустин қадамҳои хешро дорад ва албатта бо шебу фарозҳояш. Шумо дар ибтидо бо кадом душвориҳо рӯ ба рӯ гардидед ва онҳоро чи гуна бартараф сохтед?

- Фикр мекунам, ки дар ҳама ҷодаҳо мушкилиҳо вуҷуд дорад. Аммо онҳоро бояд бо осонӣ аз худ дур намоӣ. Барои ҳамин аз болои худ кор кардан лозим аст. Маҳорати худро хуб истифода бурдан даркор. Ростӣ, ман бисёр заҳмат мекашам ва бо мушкилиҳо ҳамеша дар набардам, то зуд маро тарк кунанд. Ва хушбахтона то имрӯз дар ҷодаи интихобкардаам мағлуб нашудаам.

- Имрӯз миёни мухлисон сурудҳои сароидаатон ҳаводорони зиёд дорад. Ба назаратон кадом сурудатон шуморо миёни ҳаводорони санъат машҳур намуд?

- Нахустсуруде, ки бо шавқу ҳаваси зиёд хондам, ин суруди овозхони эронӣ Ҳорун Афсун бо номи “Табиби моҳир” буд, ки мухлисон онро хуш пазируфтанд ва байни мардум шуҳрат пайдо кардам. Ин суруд ба ман хеле писанд буд ва ман бо як боварии калон онро пешкаши ҳаводорони худ намудам. Дар баробари ин суруд боз дигар сурудҳоро низ замзама кардам, ки писанди мухлисонам мебошанд.

- Шумо ғолиби озмуни “Central Asia's Got Talent” шудед. Вақте шуморо сазовори ҷои аввал донистанду бо мукофот қадрдонӣ намуданд, чӣ эҳсос доштед ва аз кӣ бештар сипосгузоред?

- Вақте ки аз ин озмун хабардор шудам, тасмим гирифтам, маҳорати худро бисанҷам. Барои ман иштирок кардан дар чунин озмуни сатҳи баланд як орзу буд. Баъди тасмими иштирок, интихоби суруд бисёр душвор буду мулоҳизакориро талаб мекард. Билохира суруди “Турки шерозӣ”-и устод Далер Назаровро интихоб намудам.

Албатта, ман ба истеъдоди худ бовар доштам, вале ин ҷо гап сари овоздиҳӣ мерафт ва ман боварӣ надоштам, ки мардуми Тоҷикистон маро ин қадар дастгирӣ мекунанд. Дӯстони маҷозиам, маро “ту беҳтаринӣ” гуфта, боқувваттар карданд, то ғолибиятро ба даст орам. Ман аз ҳамаи мухлисон ва мардуми шарифи Тоҷикистон сипосгузорам. Зеро маҳз мардуми тоҷик вақти қимати худро дареғ надошта, дар лаҳзаҳои охирини ҷамъбасти озмун бо ман буданд ва тавонистанд, барои ман миёни 12 иштирокдори даври ниҳоӣ дар шаҳри Нурсултони Қазоқистон ғалабаро тақдим кунанд.

- Чун дар арафаи ҷашни 30 - солагии истиқлолият қарор дорем, мегуфтед, ки ба назари шумо истиқлолият дар рушду пешрафти ҳаёти ҷавонони кишвар чӣ таъсире расонд?

- Ҷавонони даврони истиқлолият хушбахттарин ҷавононанд, зеро истиқлолият пеш аз ҳама дарҳои бастаро барои ҷавонон боз кард. Имрӯз санъаткор бо санъати худ, донишманд бо дониши худ, варзишгар бо варзиши худ кишвари моро дар арсаи байналмилалӣ муаррифӣ менамояд. Мо - ҷавонон бояд аз ҳамаи ин озодиҳо хуб истифода бурда, ҳунари воло ва фарҳанги бойи тоҷиконаи худро дар хориҷи кишвар нишон диҳем, парчамбардори кишвар бошем.

- Бахшида ба истиқболи ин ҷашни таърихӣ омодагиҳо чӣ гуна аст? Оё Шумо ягон суруди навро барои мухлисон омода намуда истодаед?

- Агар хоҳӣ, ки мухлисонат доимо туро ёд кунанд, пас барои онҳо сурудҳои нав пешкаш кун, то ҳамеша дӯстдорат бошанд. Санъаткор бояд чизи нав эҷод кунад. Чун ӯ ҳамеша бо сурудҳои худ барои мардум зинда аст. Яъне ӯро сурудҳои нав гӯё аз нав ба олами ҳастӣ ворид мекунанд. Ман ҳамчун санъаткор кӯшиш мекунам, ки дар рӯзҳои наздик ба мухлисони худ сурудҳои навамро пешниҳод кунам.

- Дар оянда чӣ нақшаҳо доред ва таманниёти Шумо бахшида ба 30 - солагии истиқлолияти давлатӣ?

- Нақша дорам, дар озмунҳое, ки бояд дар хориҷи кишвар баргузор гарданд, иштирок кунам. Аз ҳозир омода мешавам. Иштирок ва баланд бардоштани Парчами Тоҷикистон дар озмунҳои сатҳи ҷаҳонӣ вазифаи мост. Мехоҳам, бо тайёрии ҷиддитар иштирок намуда, парчамбардори давлати худ бошам.

Барои мардуми шарифи Тоҷикистон 30 - солагии Истиқлолияти давлатии Ҷумҳурии Тоҷикистонро муборакбод гуфта, барои ҳар як хонадони тоҷик баракат ва сулҳу амониро орзумандам.