Бо фарорасии соли нави мелодӣ театрҳои касбии кишвар дари худро боз намуда, ҳаводорони ҳунари асилро барои тамошои намоишномаҳои идона таклиф мекунанд.    

Театри давлатии мазҳакаи мусиқии ба номи Камоли Хуҷандии шаҳри Хуҷанд намоишномаи “Анна ва Элза”-ро дар таҳияи коргардон Суҳров Шехов ба саҳна гузоштааст, ки интизор меравад, давоми моҳи январ соли 2022 намоиш дода шавад.

Театри давлатии мусиқии тамошобини ҷавон ба номи Одилҷон Назарови шаҳри Хуҷанд намоишномаи “Сеҳри асо”-ро зери назари Темур Султонӣ таҳия намудааст, ки аз 23-юм то 30 декабри соли ҷорӣ манзури кӯдакону наврасон мегардад.

Театри давлатии русии драма ва мазҳакаи ба номи Александар Сергеевич Пушкини шаҳри Бӯстон бошад, намоишномаи “Кот Леополд”-ро ба саҳна гузоштааст, ки аз 21-ум то 31-уми декабр намоиш дода мешавад.

Театри давлатии драмаи мусиқии ба номи Тӯҳфа Фозиловаи шаҳри Конибодом намоишномаи “Гӯшдарози ҳилагар”-ро бо коргардонии Юнусалӣ Эргашев таҳия намудааст, ки аз санаи 20-уми декабр то 20-уми январ ба саҳна гузошта мешавад.

Амони МУҲАММАД, коромӯзи “ҶТ”