Дар Муассисаи давлатии “Телевизони Сафина” оид ба амалисозии ташаббус панҷуми байналмилалии Президенти кишвар, муҳтарам Эмомали Раҳмон дар барои эълон шудани соли 2025 ҳамчун Соли байналмилалии ҳифзи пиряхҳо нақшаи чорабиниҳо таҳия ва тасдиқ гардида, тибқи он миёни кормандони муассиса барои таҳияи “Беҳтарин филми мустанад” озмун эълон гардид. Дар ин бора имрӯз директори “Телевизони Сафина” Садриддин Шамсуддинзода зимни нишасти матбуотӣ хабар дод.

Ҳамчунин директори ин муассиса таъкид намуд, ки тибқи нақша “Телевизони Сафина” соли 2025 дар назди худ радио таъсис медиҳад, ки дар баробари шумораи тамошобин шунавандагони ин муассисаро низ зиёд мекунанд.

- Давоми соли гузашта қариб 70%-и кори радио амалӣ шудааст. Аммо боз мушкилиҳое ҳастанд, ки бояд рӯи кор овард. Аз ин рӯ мо кушиш мекунем, ки дар арафаи 20 солагии ҷашни “Телевизони Сафина” радиоро низ фаъол мекунем,-гуфт С. Шамсуддинзода.

Ба гуфтаи Директори телевизион бо фаъол шудани радио боз 15 нафар рӯзноманигорон ба кори доимӣ ҷалб ва таъмин карда мешаванд.

Наҷиба МУРОДБЕКОВА, “ҶТ”