Дар павилиони Муассисаи давлатии “Тоҷикфилм” санҷиши видеоии ҳунарпешаҳо барои нақшофарӣ дар филми “Дурахши ахтарон: Ҷомӣ ва Навоӣ” оғоз гардидаст. Бо ин мақсад чанде пеш гурӯҳи эҷодии “Узбекфилм” ба Тоҷикистон омад.

Тавре муассисаи давлатии “Тоҷикфилм” иттилоъ медиҳад сафари гурӯҳи филмофарон аз Узбекистон то 13 сентябр идома ёфта, зимни он дар ҳамкорӣ бо гурӯҳи эҷодии “Тоҷикфилм” ҳунарпешаҳо барои нақшофарӣ дар филм мавриди санҷиш қарор дода мешаванд.

Ҳамчунин, дар ин давра сохтани ороишоту саҳнасозӣ ва пешниҳоду тасдиқи лоиҳаи ангоравии либосҳо низ дар назар аст.

Гуфта мешавад, ки наворбардории филми ҳунарии муштараки “Дурахши ахтарон: Ҷомӣ ва Навоӣ” то соли 2025 идома меёбад.

Ин дар ҳолест, ки Маҳмадсаид Шоҳиён, директори Муассисаи давлатии “Тоҷикфилм” зимни охирин нишасти матбуотӣ гуфта буд, ки дар нимсолаи дуюми соли 2024 таҳия ва банаворгирии ин филм ба анҷом хоҳад расид.

Бояд гуфт, ки филми “Дурахши ахтарон: Ҷомӣ ва Навоӣ” дар доираи ҳамкориҳои дуҷонибаи синамогарони Тоҷикистону Ӯзбекистон таҳия мегардад.