Овозхони ҷавони тоҷик Фахриддин Ҳакимов дар мавсими 12-уми озмуни вокалии “Голос”-и Федератсияи Русия иштирок мекунад. Ӯ ягона нафарест, ки дар ин мавсим Тоҷикистонро муаррифӣ хоҳад кард.

Аз миёни ҳазорон дархостҳои ба ин озмун ирсолшуда танҳо 700 нафар ба кастингҳо даъват мешаванд ва аз онҳо ҳамагӣ 100 нафар ба марҳилаҳои баъдӣ мегузаранд.

Фахриддин Ҳакимов бо нашри наворе дар саҳифаи Инстаграмми худ изҳор доштааст, ки мехоҳад Ватани худро шоиста муаррифӣ кунад ва истеъдоди худро ба тамошобинон хуб расонад.
- Умедворам дар сатҳи олӣ баромад карда Тоҷикистонро муаррифӣ мекунам- гуфтааст ӯ.

Мавсими 12-уми озмуни вокалии “Голос” имрӯз - 9 феврал соати 21:45 дақиқа аз шабакаи якуми Русия пахш хоҳад шуд.

Фахриддин Ҳакимов муҳассили Академияи мусиқии ба номи Лариса Долина буда, қаблан дар озмуни “X-Factor”-и Белорусия ҳам ширкат намуда, диққати аъзои ҳакамон ва тамошобинонро ҷалб карда буд.

Ёдовар мешавем, ки то имрӯз дар ин озмун аз Тоҷикистон сарояндаҳои дигар ба мисли Даниел Рустамов ва Илҳом Тоҳиров низ иштирок карда буданд.

Сайёраи ҚИЁМИДДИН, “ҶТ”