Имсол ҷашни Наврӯзи вилояти Хатлон дар ноҳияи Фархор баргузор мегардад.

Дар ин бора Қарори раиси вилояти Хатлон Давлатшоҳ Гулмаҳмадзода ба тасвиб расидааст.  

Бурҳониддин Раҷабов, сардори Раёсати фарҳанги вилояти Хатлон, гуфт, ки сенарияи барномаи фарҳангии таҷлили Наврӯз қабул шудааст. Муаллифи сенарияи намоиши театрикунонидашудаи «Наврӯзи ҷаҳонӣ – Наврӯзи ҷавонӣ» шоир Файзи Ашӯр буда, аз рӯйи он имрӯзҳо дар варзишгоҳи марказии ноҳияи Фархор тамрин мегузарад.

Қисмати театрикунонидашудаи намоиши наврӯзӣ дар ихтиёри муҳассилини муассисаҳои таълимӣ қарор дорад. Масъулини қисмати мазкур талош доранд ҳама он анъанаву суннатҳои то ба имрӯз расидаи Наврӯзи ниёгонамонро бо тамоми мазмуну шакли аслиашон манзури иштирокчиён намоянд.

Бо мақсади  таҷлили ин иди фархундапай як зумра озмунҳои фаннию фарҳангӣ, аз қабили  «Суханвар», «Донишвари  умедбахш», «Ҳофиздонӣ», «Бедилдонӣ», “Шоҳномахонӣ», «Лоиқхонӣ», «Чилкокули фархорӣ»-ро ба таври муташаккил роҳандозӣ намуда, ғолибони озмунҳои мазкур дар ҷашни Наврӯз муайян мешаванд.

Наврӯзи Хатлон дар варзишгоҳи шаҳраки Фархор баргузор мегардад, ки он дорои 10 ҳазор ҷойи нишаст буда, ба таври идона оро дода шудааст.

Умед Мирзоев,"ҶТ"