Фаррух Ҳасанов, овозхони ҷавони тоҷик рӯзи 7 март дар Кохи Борбад – бузургтарин толори консертии шаҳри Душанбе барои аввалин бор консерти инфиродии худро баргузор мекунад.

Дар ин бора овозхон дар саҳифаи инстаграмии хеш хабар додааст.

Бино ба гуфтаи масъулин консерти мазкур як рӯз қабл аз Иди Модар - 7 март, соати 18:00 баргузор гашта, чиптаҳо аз 80 то 350 сомонӣ арзиш доранд.

Лозим ба ёдоварист, ки сарояндаи 25-солаи тоҷик Фаррух Ҳасанов моҳи ноябри соли гузашта дар мавсими 5-уми ҷашнии озмуни “Ну-ка, все вместе!” (“Биёед, ҳама якҷоя!”)-и шабакаи телевизионии “Россия-1”-и Федератсияи Русия ғолиб омада, соҳиби Шоҳҷоиза ва 5 000 000 рубли русӣ гардида буд.

Ба ҳунари сарояндагии Фаррух овозхонҳои машҳури Русия, аз ҷумла Филипп Киркоров, Николай Басков, Сергей Лазарев ва дигарон баҳои баланд дода буданд.

Пешвои миллат муҳтарам Эмомалӣ Раҳмон низ ба ҳунари волои ин сарояндаи ҷавон таваҷҷуҳ зоҳир карда, дар як ҷаласа аз Фаррух Ҳасанов ситоиш карда буданд.

Ҳамчунин, раиси шаҳри Душанбе Рустами Эмомалӣ барои ин дастоварди беназири сароянда ба ӯ калиди хонаи 3-ҳуҷрагӣ тақдим намуда буд.

Бояд гуфт, консерти ин сарояндаи ҷавон дар ҳоле дар бузургтарин толори консертии шаҳри Душанбе - Комплекси давлатии Кохи Борбад баргузор мегардад, ки чандин сол аст дар ин макон танҳо чорабиниҳои сатҳи давлатӣ доир мешуд. Консерти Фаррух Ҳасанов аввалин чорабинии фарҳангии инфиродии чанд соли охири ин кох хоҳад буд. Толори калони консертии ин кох 2000 ҷойи нишаст дорад.

"ҶТ"