Раёсати кор бо занон ва оилаи мақомоти иҷроияи ҳокимияти давлатии вилояти Хатлон бахшида ба 26-солагии Истиқлолияти давлатии Ҷумҳурии Тоҷикистон давраи якуми Фестивали ҷумҳуриявии «Тоҷикона ҷаҳони шавем»-ро дар маркази вилоят шаҳри Қӯрғонтеппа бо иштироки занону духтарони 25 шаҳру ноҳияҳои вилоят баргузор намуд.

Тавре аз шуъбаи иттилотии ҳукумати вилоят хабар доданд, мақсади баргузории Фестивал арҷ гузоштан ба либоси миллӣ, ҳисси ифтихори миллӣ, намоиш додани щунари тарроҳӣ мебошад.

Манбаъ афзуд, ки фестивал дар се бахш - бахши либосҳои расмӣ бо дарназардошти хусусиятҳои хоси либоси миллӣ, бахши либосҳои миллӣ бо дарназардошти сину сол аз 20-30 сола, 30 то 50 сола ва аз 60 боло ва бахши либоси миллии арӯсӣ гузаронида шуд.

Дар фестивал шаҳру ноҳияҳои Қӯрғонтеппа, Норак, Бохтар, Вахш, Қубодиён, Хуросон, Ҷалолиддини Балхӣ, Панҷ, Мир Сайид Алии Ҳамадонӣ, Носири Хусрав, Ёвон ва Муъминобод фаъолона иштирок намуда, беш аз 150 адад сару либосҳои миллӣ ба намоиш бароварданд.

Умед МИРЗОЕВ, “ҶТ”