Филми кӯтоҳи ҳунарии “Этюд”-и Муассисаи давлатии “Тоҷикфилм”, бо коргардонии Мумин Латифӣ дар 12-умин Ҷашнвораи байналмилалии филмҳои варзишии Барселона иштирок мекунад.

Тавре коргардон иттилоъ дод, фестивал дар шаҳри Барселонаи Испониё аз 14 то 20 феврали соли 2022 баргузор мегардад.

“Филми “Этюд” соли 2021 дар шаҳри Душанбе наворбардорӣ гардида, давомнокии он 16 дақиқа мебошад. Он дар жанри драмаи варзишӣ ба навор гирифта шудааст. Филм аз писараке қисса мекунад, ки дар оилаи мусиқинавоз ба дунё омадааст. Волидайн мехоҳанд, ӯ ба мусиқӣ рӯ орад, аммо худи писарак футболро дӯст медорад”, - мегӯяд коргардон.

“Этюд” кори нахустини Мумин Латифӣ аст. Ӯ 25 сол дошта, хатмкардаи факултети коргардонии Донишкадаи давлатии фарҳанг ва санъати Тоҷикистон ба номи Мирзо Турсунзода мебошад.

Ардашер ПАЙВАНД, "ҶТ"