Ба истиқболи Ҷашни байналмилалии Наврӯз дар толори фарҳангии Донишгоҳи давлатии Хоруғ чорабинии тантанавӣ баргузор гардид. Дар чорабинӣ аҳли раёсати ДДХ, намояндагони Бахши ҷавонон, варзиш ва сайёҳии шаҳр ва устодону донишҷўён ширкат варзиданд.

Ректори Донишгоҳи давлатии Хоруғ Шермамад Ҷонмамадов дар оғози чорабинии идона кулли ҷамъомадагонро ба муносибати Иди ҷаҳонии Наврўз таҳният гуфта, аз ҷумла иброз дошт, ки  Наврўзи аҷам аз бостонитарин ҷашни  миллии  мо буда, пайвандгари тамаддуни  ду давраи фарҳанги милли мо – фарҳанги ориёӣ ва исломӣ мебошад.

- Дар шароити имрўзаи ҷаҳонии гуфтугуи тамаддунҳо Наврўзи бостонӣ  шинохту арзёбии арзишҳои фарҳанги миллӣ, ташаккули худшиносӣ ва андешаи устувори миллӣ мақому аҳамияти махсуси ҳалкунанда дорад. Таърих собит намудааст, ки Наврўзи Аҷам бо ҳама таровату гуногунрангиаш чун ганҷи гуҳарбор дар гирудорҳои шадид, тохту този аҷнабиёни истилогар, ҳукмронии фарҳангҳои дигар низ  арзишу мазмуни хоси худро гум накарда, дар ҳама давру замон ба ҳар шакл ҷилову ранги навро ба худ мегирифт. Иқдоми Асосгузори сулҳу ваҳдати миллӣ - Пешвои миллат, Президенти кишвар, Ҷаноби Олӣ муҳтарам Эмомалӣ Раҳмон дар самти давлатсозии навини тоҷик, арҷгузорӣ ба фарҳанги бостонии миллат, эҳёи  арзишҳои тамаддуни миллии мо бешубҳа омил ва пойдевори  асосӣ мебошад, - илова намуд Ш. Ҷонмамадов.

Сипас, баъди суханрониҳо барои нишон додани ташаббус, ширкати фаъолона дар чорабиниҳои илмӣ - маърифатӣ, фарҳангиву варзишӣ бахшида ба Иди Наврӯз, аз ҷониби Раёсати ДДХ ва Бахши ҷавонон, варзиш ва сайёҳии шаҳри Хоруғ ба чанд тан аз омӯзгорони ҷавону донишҷўён ифтихорнома ва мукофоти пулӣ тақдим гардид.

Баъди анҷоми қисми расмии чорабинӣ аз ҷониби донишҷўёни Донишгоҳи давлатии Хоруғ барномаи ҷолиби фарҳангӣ пешкаши иштирокдорон гардид.

Машҳур ИМОМНАЗАРОВ,"ҶТ"